DILI:Sala Situasaun Sentru Integradu Jestaun Krize (SIJK) relata ohin loron 10 fulan-abril 2021 deteta tan kazu foun na'in 61, husi munisipiu Dili, Bobonaro, Ermera no mos munisipiu Ainaro, nunee kazu ativu sa'e ba 531.
Kordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, (CIGC-SS) Dr. Rui Maria de Araújo hatete, husi kazu foun nain 60 nee iha mane na'in 30 no feto na'in 31.
"Kazu konfirmadu na'in 61 nee, iha sintomatiku na'in 2 no sira neebe laiha sintomas ka asintomatiku hamutuk nain 59,"dehan nia iha konferensia imprensa, iha CCD, (10/04). Nia esplika, evulusaun iha munispiu Dili iha kazu foun nain 54.
Nune’e, kazu positivu detetadu iha Dili husi loron 7 marsu 2021 to’o ohin loron 10 abril tinan 2021 hamutuk 796.
Ho baze ba informasaun ne’ebé disponível, ekipa konjunta saúde halo fali revizaun ba fokupropagasaun ka cluster iha Municipiu Dili ho baze ba ligasaun entre kazu iha área jeografika no expozisaun ba fonte infesaun.
Ho nune’e, iha Munisipiu Dili reorganiza cluster tuir área jeográfika suku nian ho fatin propagasaun seluk mós, hamutuk 23 cluster. Iha Munisipiu Bobonaro deteta kazu foun 1. Kazu ida ne’e halo viájen husi Dili iha loron 6 abril 2021.
Iha Munsipiu Ainaro deteta tan kazu positivu 1. Kazu positivu hirak ne’e halo viájen husi Dili iha 3 abril 2021. Iha Ermera deteta tan kazu positivu 5. Kazu hirak ne’e halo viájen husi Dili.
Entretanto, dadus jeral ba loron ohin iha kazu foun nain 61, nain 54 iha Munisipiu Dili no nain 7 iha munisipiu sira seluk.
Kazu rekuperado nain 45 no kazu ativu neebe iha sala izolamentu hamutuk nain 531. SIJK nafatin apelu ba populasaun sira atu ba sira ne’ebé maski lakon uma, sasan no hela fatin, no tenki evakua ba fatin públiku sira, halo favór nafatin uza meius hotu ne’ebé iha atu hado’ok-an husi kontájiu moras Covid-19, liu-liu nafatin uza máskara, no fase liman beibeik ho bé no sabaun ka dezintetante ruma.
Husu mós ba populasaun ne’ebé provizóriamente tenki hela iha sentru evakuasaun sira, atu kolabora ho ekipa konjunta saúde, hodi foti amostra ba análize laboratóriu.
Ba populasaun ne’ebé laafetadu husi efeitu inundasaun, favór respeita nafatin regra sira ne’ebé Governu hatuur ona atu prevene moras Covid-19 da’et ba mai. Regra sira ne’e, hanesan ita hotu hatene ona.
Jornalista: Saturnina da Costa
Editor: Jose Sarito Amaral
