Tuir Ministru Edukasaun Juventude no Desportu Armindo Maia hatete, MEJD deside hodi adia kalendáriu ezame periudu dahuluk nian ba estudante Ensinu Báziku to'o Ensinu Sekundáriu Jerál no Ensinu Tekniku Vokasional iha loron 19-24 abril 2021.
“Ita deside hodi adia kalendáriu ezame ba periodu dahuluk nian nee, sei realiza fila fali iha loron 19 to'o 24 fulan abril tinan 2021 ne'e tanba relasiona ho inundasaun ne'ebé afeta ba eskola sira inklui mos iha munisipiu sira”, dehan nia iha salaun INFORDEPE, Balide, sabadu (10/04).
MEJD deside hodi adia kalendáriu ne'e tanba sei fó oportunidade ba eskola sira neebé afeita ba inundasaun hanesan iha munisipiu Baucau, Likisa no Manatutu liuliu iha kapital Dili atu bele prepara fali kondisaun eskola nian ne’ebé afetadu ba inundasaun iha loron 4 fulan-Abril tinan 2021.
Tanba ne’e, MEJD husu ba dirijente eskola sira iha territoriu tomak atu organiza profesor no estudante sira hodi bele prepara kondisaun eskola ho di'ak, atu nunee bele realiza ezame ba periodu dahuluk nia ho diak, maske Timor-Leste sei hasoru ho dezafius oioin.
Durante ne’e MEJD deside ona kalendáriu ezame ba periodu dahuluk nian iha loron 12 too 17 fulan-Abril tinan 2021, maibé iha loron 4 fulan-Abril akontese inundasaun iha Timor-Leste ho ida ne’e MEJD adia fali ba loron 19 too 24 fulan-Abril tinan 2021.
Molok ne’e, Diretór Jerál Ensinu Sekundaria MEJD, Deolindo da Cruz informa katak, dadus ne’ebé durante ne’e MEJD rekolla husi ensinu sekundaria jeral no ensinu tekniku vokasional iha territoriu laran tomak iha tinan 2021 estudante hamutuk 73.166, kompostu husi ESG hamutuk 57.921 no ESTV 15.245, ho númeru ida ne’e total estudante hamutuk 30.369 mak sei tuir ezame ba dahuluk nian no 42.796 mak la tuir ezame ba dahuluk nian,”tenik nia.
“Ita nia estudante sira ne’ebé atu tuir ezame ba periodu dahuluk nian hamutuk 30.369 nee mai Munisipiu ualu mak hanesan, Manatuto, Manufahi, Ainaro, Aileu, Ermera, Bobonaro, Liguica no Rejiaun Administrativa Espesial Oecusse Ambeno (RAEOA),”dehan nia.
Bazeia ba estudante sira ne’ebé la tuir ezame dahuluk nian iha fulan ida ne’e, MEJD sei fó oportunidade ba dirijente Edukasaun Munisipal sira, atu nune’e deside hodi hili opsaun rua ne’ebé hanesan formativa ka sumativa.
Formativa no sumativa ne’e signifika katak sira hakarak deside modalidade formativa entaun bele realiza sistema avaliasaun ba estudante sira maibé, bainhira sira deside modalidade sumativa entaun estudante sira bele hein too situasaun normal mak foin bele tuir ezame ba dahuluk nian.
Entretantu, Kordenador do Kurrikulum Nasional Pedro Ribeiro Gonçalves informa tan katak, implementa programa eskola ba uma ne’e ba eskola sira ne’ebé durante ne’e MEJD suspende ona sira nia prossesu aprendijazem hanesan iha munisipiu Vikeke, Baucau no Dili no ba eskola sira neebé mak la implementa serka sanitaria kontinua nafatin sira nia prossesu aprendijazem tuir kalendariu ne’ebé MEJD hatur ona.
“Ita nia programa ida ne’e implementa deit ba eskola sira ne'ebé durante ne’e ita nia governu implementa serka sanitaria no ba eskola sira neebé mak la implementa serka sanitaria ne’e kontinua nafatin sira nia prossesu aprendijazem hanesan baibain, no sira sei realiza ezame ba dahuluk nian”, dehan nia.
Jornalista: Adelaide dos Santos
Editor: Jose Sarito Amaral
