"Ha'u rezeita informasaun falsu ne'ebé halao husi ema ne'ebé bolu iseng iha media sosial," dehan nia.

Tuir nia, Prezidente CNRT ne'ebé nu'udar ema rezistensia la permite nia membru ida atu halo ligasaun ho kriminozu.

"Se ema ruma mak hala'o atividade ne'e oknum laos partidu CNRT tanba partidu nunka mete buat hirak ne'e," deklara nia.

Dionisio apela ba kuadrus no militantes CNRT iha Timor laran tomak atu tau nafatin konfiansa ba Kay Rala Xanana Gusmão hodi serbisu hamutuk ho lider hotu atu lori buat di'ak ba Timor Leste.

Entretantu, Bankada CNRT iha Parlamentu Nasionál haruka ona karta ba PNTL atu halo investigasaun ba sidadaun balun ne’ebé produz osan falsu iha Indonezia.

Prezidente Bankada CNRT, Duarte Nunes dehan, kazu iha video ne'ebé dadauk ne'e sirkula iha facebook akontese iha tinan kotuk.

Duarte deskonfia iha intensaun politika ba públikasaun video ne'e, tanba video ne'e públika bainhira koligasaun foun deklara sira-nia ezistensia.

“Ita iha situasaun ida agora ne’e kuandu ema di'ak ita sempre hamutuk nia, maibé kuandu la hamutuk ne’e la di'ak hotu ona, hanesan maun Xanana kuandu la hamutuk ho sira ne’e ema aat, maibé kuandu hamutuk ne’e tau iha lalehan, ida ne’e problema iha nasaun ida ne’e,” dehan nia.

Tan ne'e, nia dehan, CNRT haruka ona karta ba PNTL atu halo investigasaun.

"Agora hein de'it nia prosesu investigasaun iha tribunal, tanba kuandu dadus ne’ebé iha investigasaun nia laran monu fali iha media signifika ema ruma iha intensaun, ema ma-fe serbisu estadu nian," dehan nia.