Hanesan públiku hatene, iha loron hirak ikus ne'e mosu gravasaun video iha media sosial Facebook ne'ebé hatudu autoridade seguransa Indonezia halo kapturasaun ba Timor-oan balun ne'ebé deskonfia halo osan falsu.
Iha video refere, autor ida ho inisial BCM temi Maun Boot Xanana Gusmão no Brigadeiru Jenerál F-FDTL Cornélio Ximenes “Mau-Nana” mak "orienta" sira hodi halo osan falsu.
Hafoin video ne'e sirkula, iha Kuarta (04/03), Polisia Nasionál Timor Leste (PNTL) liu husi konferensia imprensa deklara katak autór sira iha video ne'e ko'alia lia bosok.
"Ha'u aproveita oportunidade ne’e atu hato'o ba aman no maun veteranu sira katak informasaun ne’ebé husi autòr uza hodi temi ita-boot sira-nia naran ne’e la loos no bosok. Iha publikasaun deteta katak iha ne’ebà atu halo fabrika ba osan falsu maibé iha prosesu la deteta no la loos," deklara Komandante PNTL Faustino da Costa iha Kuartel Jeral PNTL, Kaikoli, Dili, Kuarta (04/03).
Tuir Faustino video ne'ebé públika iha media sosial ne’e ho intensaun atu kria instabilidade iha Timor Leste no aproveita situasaun poĺìtika atual hodi hamosu konfuzasun entre lider istòriku, veteranu, lider politiku, no mós instituisaun defeza no seguransa.
Komisariu ne'e husu mós ba públiku, liu-liu sira ne'ebé asesu facebook atu hapara ona divulga informasaun ne'ebé bele kria instabilidade no dezintendimentu entre lider no entre populasaun sira.
Inkeritu ba Ekipa Investigasaun PNTL
Komandante Jeral PNTL Komisariu Faustino esplika kona-ba kazu produs osan falsu katak, iha 28 Dezembru 2019 Komando PNTL simu informasaun katak iha indikasaun ema no grupu balun ne'ebé envolve Timor-oan balun hala'o atividade ne'ebé deskonfia burla.
Ho informasaun ne'e, nia hatete, iha 6 Janeiru 2020, Komando PNTL halo koordenasaun ho Polisia Indonezia hodi bele halo atualizasaun. Hafoin ida ne'e, Komando PNTL husu autorizasaun ba governu Timor Leste hodi haruka ekipa investigasaun ida hodi dezloka ba Indonezia.
Iha 19 Janeiru, Komisariu Faustino hatutan, ekipa investigasaun TL hasoru malu ho Polisia Indonezia hodi hahú halo identifikasaun no rekolla dadus relasiona ho kazu refere.
Durante prosesu invetigasaun, Komisáriu Faustino dehan, ekipa sira halo duni gravasaun video.
Maibé, nia dehan, kazu osan falsu ne'e rasik sei iha hela prosesu investigasaun no seidauk konsidera nu'udar krime tan ne'e Komando PNTL la divulga informasaun saida de'it ba públiku.
Komisariu ne'e hatutan, Komando PNTL sente hakfodak bainhira haree vídeo iha média sosiál.
Tanba ne'e, nia dehan, Komando sei halo interogasaun ba ekipa investigasaun ne'ebé dezloka ba Indonezia hodi bele hatene see mak fahe video refere iha media sosial.
"Komandu Jeral PNTL hanesan ha'u temi katak Inspetor Jeral PNTL sei halo inkeritu ba membru sira ne’ebé dezloka ba Indonezia no karik deteta ka publikasaun ida ne’e iha relasaun kotribuisaun husi oknum ruma PNTL nian mak Komando Jeral PNTL sei la tolera ba aktus ne’e," deklara Faustino.
Nia dehan, Komando PNTL prepara ona karta ida no sei haruka ba Ministèriu Pùbliku relasiona ho pùblikasaun video iha media sosial.
