Deputadu bankada CNRT, Duarte Nunes konsidera, presiza duni fó prioridade ba alterasaun LPV tanba durante ne’e povu sempre kestiona.
“Ida ne’e klaru, ami mós kestiona, ita hotu tenke konsidera atu diskute kona-ba Lei Pensaun Vitalisia, ne'e importante. Tanba ita reprezentante povu tenke diskute duni opiniaun povu nian, par ita hotu haree, tanba ita-nia komprimisu mak ida ne'e, ita tenke halo buat di'ak ba povu no nasaun,” dehan Duarte iha Parlamentu Nasionál, Kinta (22/06).
Tan ne’e, nia afirma, CNRT sei fó prioridade ba alterasaun LPV durante loron 100 nia laran.
“Ami prontu diskute Lei Pensaun Vitalisia ne'e, maibé la’os ami, CNRT, de'it, maibé iha koligasaun no partidu opozisaun sira, tanba lei tama iha Parlamentu Nasionál ne'e deputadu sira mak sei diskute, signifika ita hotu fó ita-nia hanoin, tanba halo komprimisu ba povu tenke halo buat di'ak,” deklara nia.
Ba kestaun ne’e, Prezidente Parlamentu Nasionál eleitu, Maria Fernanda Lay hatete, durante ne’e deputadu sira halo ona altesaun hodi hasai previlejiu lubuk ida iha LPV.
Maske nune’e, nia hatutan, karik iha vontade politika husi deputadu sira atu altera tan LPV, bele altera.
"Iha prioridade barak atu servi povu, hadia ekomonia, kampu servisu tenke la'o. Ami prontu servisu hamutuk ho Governu foun, tanba ne’e Lei Pensaun Vitalisia bele hamoos, laiha buat ida,” katak nia.
Entretantu, Diretora JSMP, Ana Paula Marçal, husu ba deputadu lejislatura daneen atu tau prioridade ba alterasaun LPV.
“Ami husu par tau prioridade ba altesaun Lei Pensaun Vitalisia par ema hotu hetan tratamentu hanesan. Ami lakohi atu deputadu sira hetan oportunidade iha Parlamentu Nasionál hodi uza Lei Pensaun Vitalisia atu hetan previlejiu,” dehan nia.
Molok ne’e, Prezidente Repúblika, José Ramos Horta, husu mós ba deputadu foun Parlamentu Nasionál atu halo reforma ba Lei Pensaun Vitalisia, tanba lei refere hamosu klase sosial.
Tuir PR Horta, lejislatura daneen ne’ebé sei mai tenke halo de’it reforma ba Lei Pensaun Vitalisia (LPV), la presiza halakon.
“Lei Pensaun Vitalisia lalika hakakon kompletu. Primeiro, kuitadu deputadu sira ita kritika sira mós lubuk ida ema kiak, balun veteranu, balun oan lubuk ida. Purtantu lalika hasai osan kompletu, maibé haree hatun tiha pensaun ne'e, se nia tinan 20 iha Parlamentu Nasionál bele konsidera pensaun vitalisia.”
“Maibé ida foun, tinan 15 tanba sa mak pensaun vitalisia fali, bele simu de'it 75%, ne'e di'ak ona, tanba iha Portugál deputadu sira pensaun vitalisia maibé nune'e pelumenus tinan 12 servisu nu'udar deputadu maibé sei joven tinan 30 to’o 40 nune'e la simu pensaun vitalisia, pensaun ne'e ba iha konta MSSI, bainhira kompletu ona idade reforma entaun osan ne'e entrega, se la'e simu pensaun vitalisia husi estadu,” dehan PR Horta ba jornalista sira hafoin entrega nesésidade bázika ba komunidade vulneravel iha Suku Maliboro, Postu Administrativu Dom Aleixo, Munisipiu Dili, Kinta (08/06).
Horta dehan, LPV ne’e governu konstituisionál dahuluk mak inventa no Horta rasik mak promulga iha 2007, maibé tanba momentu ne'eba sira hatete ba PR Horta katak pensaun vitalisia ne'e aplika de'it ba deputadu asembleia konstituinte.
"Maibé depois mai sira hotu-hotu (simu) pensaun vitalisia, tenke haree oinsa halo reforma ba ida ne'e, la'ós tanba osan boot loos, deputadu na'in hira, la'ós barak demais, maibé buat ida ne'ebé la loos, tanba sira mandatu tinan haat de'it," dehan Xefe Estadu ne’e.
