Iha karta notifikasaun haktuir, atu kumprimenta bá despaixu husi Inspetora Ministériu Públiku, Zélia Trindade, hodi deklarasaun husi jornalista Rogério Pereira Cárceres, iha Ministériu Públiku nian, loron 22 Juñu 2023, tuku 10:00 Otl.
Depois simu tiha karta Notifikasaun husi Ministeriu Publiku Jornalista Rogério Pereira Cárceres akompaña husi Xefe Redasaun Hatutan.com, Francisco Belo Simões, to'o iha Edifisiu Prokuradór Jerál Repúblika (PJR), tuku 9:45 Otl. No parte resepsionista nian lori kedas Jornalista Rogério Pereira Cárceres bá presta deklarasaun iha prokuradór hahú tuku 10.00 remata iha tuku 11:03 Otl.
Jornalista Hatutan.Com, Rogério Pereira Cárceres, hatete, nia parte simu duni karta notifikasaun husi ofisial MP nian iha redasaun Hatutan.com iha loron 20 Juñu 2023, tuku 15:00 Otl.
Nia dehan, konteudu notifikasaun ne’e ho naran notifikasaun komparénsia (Nontificação Comparência) husu atu nia rasik presta deklarasaun hodi konfirma asuntu balun bá prokuradór ligadu ho notísia balun ne’ebé publika iha Mídia online Hatutan.com.
"Ha'u hanesan sidadaun ida nomos Jornalista ha'u kumpri ba notifikasaun ida ne'e. No ohin ha'u konsege presta ona deklasaun ba prokurador sira iha Ministeriu Publiku," dehan nia ba Jornalista sira iha edifisiu PJR, Kaikoli, kinta ne’e (22/06).
Nia haktuir, Ministeriu Publiku notifika Jornalista de'it la'os midia hatutan.com, maibe depende ba komptensia MP karik ida dadus ruma persija rekolha, ita prontu kontribui.
"Ha'u hanoin ohin mai presta deklarasaun kolega sira akompana liu-liu ligadu publikasaun notisia balun iha hatutan.com kona-ba viagem prokurador jeral nia ba iha rai-liur. Ida-ne’e de’it, buat seluk, ha’u labele ko’alia tanba segredu justisa", Nia hatutan.
Iha fatin hanesan, Xefe Redasaun Hatutan.com, Francisco Belo Simões, hateten, los duni iha 20 Junu 2023 ofisial MP lori karta intrega direita ba xefe redasaun midia hatuta.com hodi notifika indika ba Jornalista Rojerio Pereira Carceres.
Nune'e depois simu tiha karta refere nia parte deside hodi haruka Jornalista refere kumpri notifikasaun hodi presta deklarasaun iha MP.
"Ohin akompana Jornalista Rojerio Pereira Carceres hodi kumpri presta deklarasaun iha MP, bazeia ba karta notifikasaun ne'ebe fo ba nia", Nia dehan.
Nia esplika, bainhira entidade kompetente sira atu notifika jornalista sira ligadu ho produtu Jornalístiku ne’ebé publika iha midia hatutan.com relativa ho dokumentus balun, hanoin sira tenke bazeia ba espíritu Lei Komunikasaun Sosiál númeru 5/2014 no Dekretu Lei numeru 25/2015.
Iha pratika komún jornalizmu nian? Nia dehan, responsabilidade jurídiku bá produtu Jornalístiku sira ne’ebé publika iha orgaun komunikasaun sosial hanesan hatuta.com responsavel maximu mak Xefe Redasaun la’ós Jornalista.
Nune'e, nia husu bá membru órgaun soberanu sira, polítiku sira, entidade sira no povu hotu, katak bainhira sente ofendidu ho publikasaun notísia iha mídia sira nian, ka mídia sira sita sala deklarasaun fonte sira-nian, favor uja Direitu de Resposta no Direitu Retifikasaun ne’ebé prevalese iha Lei Komunikasaun Sosiál kapitulu 5 (Direto de Resposta no Retifikasaun) artigu 34.
Nia afirma, produtu Jornalístika ne’ebé publika iha mídia ka órgaun komunikasaun sosiál sira iha tendénsia krime, di’ak liu haruka karta notifikasaun bá Xefe Redasaun sira, tanba Xefe redasaun mak assume responsabilidade másimu iha redasaun Mídia ida-idak nian.
Nune'e, inklui hola responsabilidade perante Lei Komunikasaun Sosial artigu 31 numeru 4, katak, Konsellu Redasaun ne’ebe xefia husi Xefe Redasaun mak hatan ba produtu jornalistiku hotu iha liur no iha laran.
