AHDMTL: IX Governu Tenki Realiza Promesa Ne'ebé Hato'o Iha Palku Pólitiku Featured

By Ivonia Varela Juñu 22, 2023 480
Diretor Ezekutivu Asosiasaun Halibur Difisiensia Matan Iha Timor-Leste (AHDMTL) Gabriel Ponsiano Souza. Foto:INDEPENDENTE/Ivonia. Diretor Ezekutivu Asosiasaun Halibur Difisiensia Matan Iha Timor-Leste (AHDMTL) Gabriel Ponsiano Souza. Foto:INDEPENDENTE/Ivonia.

DILI: Diretor Ezekutivu Asosiasaun Halibur Difisiensia Matan Iha Timor-Leste (AHDMTL) Gabriel Ponsiano Souza hatete, Governu foun tenki realiza promete polítiku ne'ebé hato'o ona iha palku polítiku liga ho problema ema ho difisiensia nian.

Nia dehan, promessa polítiku ne'ebé sira hato'o ona iha palku liga ho setor edukasaun, saúde, justisa no obras públika ne'ebé iha relasaun ho EhD nia nesesidade ne'ebé abandona hela iha Timor laran.

Governu tenki asegura inkluzaun sosial no prátika duni planu estratejia ne'ebé hahú ona husi 2011 to'o 2030 ne'ebé dehan katak, sei la husik ema ida iha kotuk.

"Ha'u  dezafia  IX Governu prátika duni sira nia promesa sira ne'ebé hato'o iha palku polítiku ne'e ka lae? no ha'u husu ba sira tenki asegura ema ho difisiensia matan iha inkluzaun sosial," dehan nia ba Jornalista Online INDEPENDENTE, iha knar fatin, Manleuana, Dili, kinta ne’e (22/06).

Tuir nia, iha munisipiu sira difisiensia barak mak abandona hela no balun sei sulan hamutuk ho animal no kesi hamutuk ho animal.

"Iha Munispiu Vikeke, Postu Uatukarabau difisiensia barak mak abandona hela, ha'u fó exemplu iha postu ossu ema ho difisiensia sulan ho animal no iha Bobonaru sira kesi ho animal, tanba ne'e ha'u husu Governu ida agora tenki asegura inkluzaun sosial," nia haktuir

Ho situasaun hirak ne'e, Diretór husu ba Governu foun atu responde problema ne'ebé ema ho difisiensia hasoru iha baze liliu iha setor saúde no eduksaun,

Tan ne’e, husu atu hadi'a kualidade edukasaun ba ema ho difisiensia sira.

“Ha'u lori EhD matan hotu iha Timor laran nia naran husu ba Governu foun ne'ebé atu mai, labele tur iha fatin de'it, maibé tenki tun ba munisipiu hodi identifika problema ne'ebé ema difisiensia sira hasoru,”tenik nia.

Iha sorin seluk Diretor Asosiasaun Difisiensia Timor-Leste (ADTL) Cesário da Silva hatete, esperansa ADTL nian ba Governu foun ne'ebé mai, tenki implementa polítika hirak ne'ebé iha ona liga ho asuntu difisiensia no esperasaun boot liu mak hakarak la husik ema ida iha kotuk liliu EhD sira.

Nia dehan, ema ho defisiensia sira tenki hola parte iha prosesu dezenvolvimentu Nasionál atu nune'e bele benifisia direita ba EhD.

Rate this item
(0 votes)

Independente Digital TV