Deputada Bankada CNRT, Veneranda Lemos Martins, husu Governu halo intervensaun rapida ba mota iha suku Samalari-Buibau ne'ebé fó ameasa ba populasaun nia uma no natar.
“Ha'u simu mensajen husi husi Amu Locateli ne'ebé hatete mai katak presiza intervensaun urjénte husi governu da-sia ka Ministeriu relevante iha Samalari-Buibau, parte Baukau ninian ne'ebé haree katak mota atu sobu dadaun populasaun nia uma no natar no mós Rate ne'ebé iha besik,” Dehan nia, iha Plenária Parlamentu Nasional, Kuarta (13/12).
Deputadu Veneranda haktuir, Amu Locateli dehan bainhira la halo intervensaun lalais maka komunidade sei lakon bu'at barak iha ne’ebá tanba ne'e mak aproveita oportunidade ida ne'e hato'o hela ba Governu atu halo intervensaun urjente.
Nia afirma, segundu iha mós komunidade koventa iha Maliana Tunubibi ni’an, iha ne’eba Madre sira loke Eskola iha mós klínika, maibé dalan ba sira-ne'e no drainajen laiha, estrada mós aat, entaun iha tempu udan hanesan ne'e sira terus teb-tebes atu asesu ba klínika no mós Eskola Madre sira ni’an.
Nia reforsa, terseiru iha mós estrada ida-ne'ebé asesu ba komunidade ida hela iha Daredata, Suku Wailili, Baukau ninian atu lori sira nia produtu mai labele, tanba ho tempu udan ida-ne'e karreta mós sei la tama.
Hatan ba preokupasaun ne’e, Primeiru Ministru, Kay Rala Xanana Gusmão hatete, sei haruka Ministériu relevante hodi matan bá problema komunidade sira nian.
“Ha'u agradese tebes ba Deputada Veneranda Lemos fó hatene ohin, kona-ba Padre Locateli nia telefone, ne'e mós atu dehan de'it ba ita boot sira katak dala ruma ita temi agrikultura problema sira hanesan telefone husi Padre Locateli hatudu loloos katak ita atu halo natar karik ita tenke proteje mota, nune'e labele sobu natar, ita tenke haree took,” Dehan Primeiru Ministru Xanana.
Primeiru Ministru Xanana dehan, Ministériu relevante sei bá tau matan bá populasaun ne'ebé sente hela susar iha fatin hanesan Fatumaka nia sorin bá Galata, atu fó lembra de'it katak obrigadu tebes fó hatene mai Governu.
“Ita tenke haree mota, bee bá natar no mota sobu natar bu'at sira ne'e hotu, mais fiar katak imi sei ba monitoriza tutuir saida mak ami sei kumpri, tanba ita tenke kumpri duni,” Tenik nia.
Nune’e mós, Ministru Agrikultura ho Pekuaria, Peska no Floresta (MAPPF), Marcos da Cruz hatete, udan bo'ot semana ida nia-laran, maibé natar sira iha munisipiu seidauk hetan estragus.
“Ami hare'e udan bo'ot loron hira ne'e mota tuun ladun estragus natar barak ida, maibé husi MAPPF haruka ona eskavator sira ba munisipiu sira hodi konserva mota labele estraga natar no irrigarasaun sira,” dehan nia.
Nia haktuir, MAPPF konstrui irrigasaun sira iha munisipiu sira, maibé seidauk hetan estragus boot, ida-ne'ebé atu prevene tiha ona no udan bo'ot loron hirak liu mota seidauk hetan estragus irrigasaun boot.
Maibé ameasa sei hetan estragus, tanbá ne'e MAPPF komesa proteje dadaun ona ba irrigasaun sira. iha fatin balun iha tinan hirak liu-ba udan boot estragus natar hamutuk 50 ektares.
“Agora dadaun MAPPF halo protesaun iha ne'eba, iha parte Baukau nia husi Deputadu sira ko’alia kona-ba natar sira-ne'e, maibé buka meius ida hodi apoiu ba Baukau,” Nia relata.
