“Ha’u mai halo enkontru ho Ministru Justisa no lori Governu Brazil nia naran hakarak afirma katak, kontinua apoia kooperasaun entre Brazil ho Timor-Leste iha seitór justisa. Ami mós kompromete katak sei kontinua apoia programa Governu Timor-Leste iha seitór Justisa no ba oin sei hamutuk ho Ministeriu Justisa hodi ko’alia kona-ba kriasaun Supremu Tribunál Justisa,”deklara Maurício Medeiros de Assis ba jornalista sira hafoin enkontru ho Ministru Justisa, (7/3).
Nia esklarese, Ministru Justisa Sergio Hornai la’os ema foun ba Brazil, nia ema ne’ebé amigo di’ak ho Brazil, nia hatene di’ak liu apoiu saida mak durante ne’e Brazil fó ona iha seitór justisa.
“Ami iha programa ida naran fortalesimentu iha seitór justisa ne’ebé ami durante ne’e halao kle’ur ona ho Governu Timor-Leste tanba ho enkontru ida ne’e ami afirma kontinua programa ida liu-liu fortalese ami nian apoiu ba Defensór Públiku ba iha Tribunál oinsá atu formasaun ba Defensór, Juiz, no ofisiál Justisa atu garante asistensia juridika judiiaria ba sidadaun sira,” nia haktuir.
Iha fatin hanesan, Ministru Justisa Sergio Hornai, hateten, Embaixadór Brazil ba Timor-Leste Maurício Medeiros de Assis, halo enkontru kortesia ho nia atu kongratula nia ba kargu Ministru Justisa foun.
Tanba liu-husi enkontru ne’e Brazil afirma kontinua apoia hodi fortalese kooperasaun ne’ebé durante ne’e lao ona iha seitór justisa.
“Sira hakarak kontinua mantein kooperasaun iha área tolu mak hanesan oinsá fó apoia ba Defensór Públiku nian servisu atu fó asistensia juridiku ba komunidade ho di’ak liu tán,” nia haktuir.
Entretantu nia afirma, Brazil mós kontinua fó apoiu ba iha servisu rejistu notariadu liu-liu ba atende Pasaporte, Servisu Nasionál Kadastru, oinsá atu halo levatamentu rai dominu públiku sira ho di’ak no atribuisaun sertifikadu rai ba komunidade ho di’ak.
Nune’e mós Brazil hato’o protidaun kontinua fó asistensia lian portugés ba Juiz, Defensór no ofisiál justisa atu garante servisu siensia téknika ba juridiku no judisiariu ba povu ho di’ak.
Nia dehan, Brazil mós sei apoia Polisia Judisiariu Timor-Leste (PCIC) nune’e ba oin PCIC bele sai polísia judisiariu ne’ebé ezelente, tanba Brazil nudar estadu ne’ebé iha demókrasia no estadu ida respeitu ba direitus umanus .
