Bainhira Nai Maromak hatan directamente ba ita nia necessidade ita bolu ne’e milagre.

Maibé baibain Nai Maromk hatán ba situasaun concreta sira liu husi ita ema nia colaboração.

Por exemplo, Jesus Cristo atu fo han ema rihun lima precisa labarik ida disponibiliza nia “paun fuan lima no ikan rua”. (Mt. 14, 13-21)

Profeta Isaías no S. Paulo nia liafuan sei mai fo naroman liu tan atu ita ema ida-idak compreende ita nia actividade no responsabilidade sira hotu nu’udar vocação ida: “Israel, ó hau nia atan; husi ó, hau hatudu hau nia glória … então Nia dehan mai hau: laos deit atu sai hau nia atan, atu hafoun hikas fali Jacob nia tribu sira no hatudu dalan ba mate resto sira Israel nian: Hau sei halo ó sai naroman Nação hot-hotu nian, atu hau nia moris rohan laek bele to’o ba rai sikun hot-hotu”. (Is. 49, 3, 6)

Ba elisaun antecipada tinan 2018, Bispu nain tolu hakarak convida mós forças politico-partidárias sira hotu atu haré ba actividade no missão politica hanesan vocação ida.

Katak ba sarani ida, nia actividade politika bele sai hanesan resposta ne’ebé actor político ida ne’e bele fo ba Maromak nia “chamamento” atu nia bele serbí nia maun-alin sira liu husi dalan politika nian.

S. João Paulo II iha nia Carta Apostólica “No Início do Novo Milénio” (no 50), convida ema hotu, liliu sarani sira atu hateke ba mundo ne’ebé habo’ot-an ba daudaun ho virtudes, evolução, progresso no desenvolvimento sira hotu, maibé mundo ida ne’ebé parece que haluha tiha pessoa humana.

Haluha tiha katak progresso no desenvolvimento sira hotu nia objectivo no finalidade maka serbí ba pessoa humana.

Rai ida nia riku soin bo’ot liu no rai ida nia klamar maka nia oan sira rasik, nia cidadão sira.

Tan ne’e wainhira ita hakbesik-an daudaun ba campanha eleitoral ami convida responsáveis político sira atu fo atenção ba Estado Timor-Leste nia situasaun; liliu necessidades sira ne’ebé precisa líderes políticos sira nia intervenção atu halo Timor oan ida-idak nia moris no mós Estado no sociedade nia moris, sai diak liu tan.

Quanto mais ita conhece no identifica situasaun real sira, ita bele hetan liu facilidade atu fo resposta ba situasaun hirak ne’e duni.

Iha contexto de leitura de situasaun ne’e, maka Bispu sira sugere kaer profeta Isaías nia liafuan hodi compreende Maromak nia diálogo ho vocacionado ida-idak.

Iha diálogo ne’e Nai Maromak interpela vocacionado ida-idak de modo directo: “ Ó HAU NIA ATAN; HUSI Ó HAU HATUDU HAU NIA GLÓRIA; HAU SEI HALO Ó SAI NAROMAN NAÇÃO ISRAEL NIAN”. (Is. 49) Convida líderes responsáveis sira hotu atu, iha tempo eleições ne’ebé mai daudaun, tau ida-idak nia an hanesan “Ó” ida ne’e iha Maromak nia oin, atu rona mos Nai Maromak nia interpelação ba líderes ida-idak no força politika sira tomak.

Completa ho S. Paulo nia recomendação no exortação: “Buat hotu ne’ebé ita simu, ita simu ba ema hotu nia diak”. (1a Cor. 12, 7)