Nia dehan, los duni, iha horseik (22/07) dadersan, iha idozu ho naran Amelia ne’ebé mate iha Sede Suku Mau-Ubo, Postu Administrativu Hatulia B, Munisipiu Ermera, bainhira forma hela atu simu ninia direitu ba idozus nian.
Prezidente INSS ne’e konta tuir katak, idozu ne’e akompañia husi ninia familia to’o iha sede suku, bainhira atu tur iha kadeira maka derepenti nia monu ka dezmaia no iha ne’e kedas nia laiha iis.
Maibe antes idozu ne’e hakat ba iha sede suku, ninia kondisaun di’ak hotu.
“Kazu horseik (22/07) ne’e, ita la espera, señora ne’e mate derepente, señora ne’e ho kondisaun diak, distinu maromak ita lahatene, maibé em prinsipiu konaba pagamentu idozus, mekanismu ita muda hotu ona, ita hatete ona ba banku sira kuandu halo pagamentu iha nivel suku, ita nia inan aman sira ne’ebé maka mais idade liu, prioridade ba uluk sira, depois maka halo pagamentu ba sira seluk,”dehan nia ba Jornalista sira iha nia knar fatin, INSS, Kaikoli, Dili, Kuarta ne’e (23/07/25).
Nia hatutan, INSS mós kria ona mekanismu ida BNCTL atu halo pagamentu direita ba benifisiariu sira ne’ebé ho kondisaun moras no labele la’o.
“Pagamentu la’o normal, pesoal banku BNCTL hamutuk ho pesoal INSS halo pagamentu direita iha sira nia uma, durante ne’e iha munisipiu hotu-hotu ita implementa mekanismu tuir kontratu entre Ministeriu Solidaridade Sosial no Inkluzaun, Seguransa Sosial no BNCTL, atu la’o tuir regulamentu sira, mekanismu seluk maka BNCTL mós iha ona ajensia sira iha nivel suku tuir mapamentu banku ninian, maske suku hotu-hotu seida’uk estabelese ajensia BNCTL, maibe iha suku sira ne’ebe maka BNCTL harii ona sira nia ajensia, benefisiariu sira bele foti ona sira nia osan, lori deit sira nia konta bankaria ho eleitoral atu ba foti sira nia direitu iha ajensia banku ne’ebé maka estabelese ona iha nivel suku,”tenik Prezidente INSS.
Prezidente Konsellu Administrasaun ne’e haktuir, INSS mós halo koordenasaun ho BNCTL atu iha futuru bele estabelese ajensia hotu-hotu iha nivel suku, nune’e benefisiariu sira bele asesu sira nia direitu liu husi transferensia iha banku, fulan-fulan benefisiariu sira ba foti iha ajensia banku sira ne’ebé maka estabelese ona iha nivel suku.
“Maneira ida ne’e mak ita bele halo, atu nune’e labele predujika ita nia benefisiariu sira, ne’ebé maka mai forma kleur iha sede suku, maneira ida ne’e ita halo esforsu para depois ba futuru ita bele la’o tuir mekanismu ne’ebé maka di’ak hodi halo atendimentu ba inan aman sira ne’ebé maka iha área rural,”afirma Prezidente Arlindo Pinto.
Entretantu, Prezidente INSS ne’e akresenta liu tan, pagamentu ba faze daruak nian, iha munisipiu balun termina ona iha loron 21 fulan-ne’e no iha suku balun iha área rural pagamentu sei remata iha loron 27 fulan-Jullu tinan ne’e.
Enkuantu, tuir dadus, total benifisiariu pensaun sosial tinan 2025 hamutuk na’in 107.786, kompostu husi idozu na’in 97.359 no ema ho defisiénsia iha na’in 10.427 no orsamentu ne’ebé aloka benifisiariu refere hamutuk $32.780.541.
