Site Enjeñeiru husi kompañia Arquiris Unipesoal, Lda, Januario da Costa hatete, progresu ba kontrusaun ponte iha Kuluhun, dadaun ne’e atinji ona pursentu 30, no tuir planu sei remata iha fulan-Outubro tinan ne'e.
"Progresu ne'e atinji ona pursentu 30, ita nian tarjetu ne’e iha fulan-Outubro tenki remata, ponte ho estrada maibé estrada ami halo metru 50 de’it husi ponte liga ba Bekora, lolos ne’e ponte de'it maibé ho tan espasu metru 50, tanba atu halo ninia slop ne’e, ba Bekora 50m, inklui liga ba Audian, Bidau no Bebora," dehan nia ba Jornalista INDEPENDENTE iha Ponte Kuluhun, Kuarta (23/07).
Nia hatutan, projetu ne’e hahú iha fulan-Maiu tinan ne'e, hodi Sobu ponte tuan, no iha loron 06 fulan Juñu hahú halo konstrusaun foun ba ponte refere.
"Ita halo uluk sorin par ema bele la'o asesu ba mai, sorin ne'e posibilidade semana oin loke ona para ema liu, nune’e ita sobu fali sorin, no ita garante katak to'o Outubro bele remata ona tanba kompañia refere servisu to'o kalan," Januario esplika.
Enkuantu, orsamentu ba projetu refere ho montante rihun $600, no konstrui husi kompañia Arquiris Unipesoal Lda.
Entretantu, traballadór ne’ebé servisus iha projetu refere hamutuk na'in 20, kompostu husi Timor-oan nain 12 no estrajeiru (Indonézia) na'in ualo (8).
