Autoridade Kaptura Ema Indonezia na’in 8 Uza Viza Turista Halo Negosiu iha Vikeke Featured

By Domingos Gomes Maiu 30, 2023 274
Autoridade seguransa iha munisipiu Vikeke prende sidadaun Indonezia na’in ualu ne’ebé uza viza turista hodi hala’o atividade negosiu, iha area Vikeke, Segunda (29/05). FOTO: espesial. Autoridade seguransa iha munisipiu Vikeke prende sidadaun Indonezia na’in ualu ne’ebé uza viza turista hodi hala’o atividade negosiu, iha area Vikeke, Segunda (29/05). FOTO: espesial.

DILI: Autoridade seguransa Timor Leste kaptura sidadaun Indonezia na’in ualu iha area Vikeke tanba uza viza turista hodi hala’o atividade negosiu. Sidadaun Indonezia hirak ne’e mós kaer de’it pasaporte fotokopia.

Tuir informasaun ne’ebé jornal INDEPENDENTE asesu, ekipa konjunta husi Polisia Nasional Timor Leste, Servisu Informasaun Militar (SIM), F-FDTL, no Departamentu Informasaun Polisia (DIP) PNTL, kaptura sidadaun Indonezia na’in ualu iha aledia Naeboruk, Suku Uma-Wain Kraik, Postu Administrativu Vikeke Villa, Munisipiu Vikeke.

Sidadaun hirak ne’ebé autoridade kaptura ho inisial AAA (45), DP (36), M (42), H (47), IMP (24), RTES (23), YA (31) no TE (38).

Sidadaun Indonezia hirak ne’e, fa’an sasan hanesan korente osan-mean, kadeli, brinkus no seluk tan.

Ekipa konjunta kaptura sidadaun Indonezia hirak ne’e bazeia ba informasaun husi komunidade balun.

Hafoin simu informasaun refere, ekipa konjunta buka tuir sidadaun sira-nia paradeiru no konsege identifika hodi kaptura no prende sasan sira-nia sasan.

Hafoin kaptura, ekipa konjunta komunika ba Polisia Eskuadra Vikeke Vila, hodi lori sidadaun na’in ualu ho evidensia, inklui motor ualu ne’ebé sira utiliza halo atividade negosiu hodi submete ba prosesu investigasaun.

Durante prosesu invetigasaun, sidadaun Indonesia na’in ualu ne’e deklara, sira tama TL ho pasaporte orjinal maibé sira uza pasaporte refere hodi sai hanesan garantia ba motor ne’ebé sira aluga.

Tuir sira-nia planu, hafoin hala’o atividade negosiu iha Vikeke, sira sei kontinua ba iha munisipiu Manufahi.

Hafoin prosesu identifikasaun, polisia komunika ba Autoridade Servisu Migrasaun hodi prosesu tuir lei migrasaun.

Rate this item
(0 votes)

Independente Digital TV