Reprezentante Espesiál Greater Sunrise Austrália, Steve Barcks informa, Primeiru-Ministru, Kay Rala Xanana Gusmão rasik aseita ho prefere halo estudu viabilidade foun.
Nia hatutan, reuniaun diak tebes ho Primeiru Ministru Kay Rala Xanana Gusmão ho akompañamentu husi Ministru Petróleu Rekursu no Minerál Francisco da Costa Monteiro hodi ko’alia kona ba progresu ne’ebé la’o dadauk ona.
“Enkontru ne’e ami koalia kona ba pasu tuir mai iha prosesu dezenvolvimentu greater sunrise nian, liliu kona ba konseitu estudu viabilidade dadaun la’o, espera iha progresu diak hodi kontinua ba oin. Ami prefere estudu viabilidade foun, ne’ebé kompañia join venture sira deside ona atu halo estudu viabilidade foun ba dezenvolvimentu greater sunrise nian,”Online ne’e sita iha komunikadu, segunda (11/12).
Nia dehan, iha estudu ne’e sira haree liu kona ba ekonómiku viável ne’ebé diak liu bainhira atu dezenvolve iha Timor-Leste ka Darwin, ne’ebé iha fulan-Juñu 2024 iha ona rezultadu.
Reprezentante Espesiál Austrália Steve Barcks informa, Austrália iha komprimisu ba projetu ne’e atu la’o ba oin, ne’ebé tenke haree mós ba viabilidade komérsiu no ekonómia nian.
“Ami deskute buat barak maibé atu dada pipeline mai Timor, ha’u hanoin sedu liu atu ko’alia, maibé ami deskute buat barak no sei update iha tempu badak,”tenik Nia.
Antes ne’e, Ministru Petróleu no Rekursus Minerais, Francisco da Costa Monteiro, hasoru malu ho CEO Woodside Meg O'Neil ho nia ekipa hodi deskuti kona-ba dezenvolvimentu Greater Sunrise.
Kompaña Petrolífera Woodside no Timor-Leste konkorda atu servisu hamutuk no fiar malu, tanba governu Timor-Leste aprova ona estudu ba selesaun konseitu ba projetu ne’e.
TIMOR GAP no Autoridade Nasional Petróleu (ANP) no Kompaña Joint Venture mós hala’o ona enkontru intensivu hodi finaliza dokumentu ne’ebé aprovadu no analiza mós Kódigu Mineiru ba Petróleu, Rejime Taxa no Kontratu ba Partilla Produsaun.
Enkuantu, Estadu Timor-Leste liu husi Timor GAP, E.P hola parte ona iha konsórsiu Greater Sunrise, ho partisipasaun maioria reprezenta 56,56%, Woodside (operadóra) 33,44% no Osaka Gas 10%.
