Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araújo hatete, evolusaun surtu Covid 19 iha Timor-Leste hahú husi 22 Fevereiru 2021, tuir klasifikasaun ne’ebé iha, komulativu kazu barak liu mai husi Munispiu Dili no Baukau.
“Iha munisipiu Dili kazu hamutuk 415, iha Baukau 26, iha Kovalima 19, iha Vikeke 11, iha Lautem 1 no iha RAEOA 1, ba iha munispiu sira seluk laiha kazu,” informa Rui liu husi komunikadu imprensa ne’ebé diariu INDEPENDENTE asesu, Tersa (30/03).
Iha 30 Marsu, Rui informa, SIJK deteta tan kazu pozitivu Covid-19 iha Dili hamutuk 50 no Vikeke 1.
Ho nune’e, total kazu detetadu pozitivu iha Munisipiu Dili husi loron 7 to’o 30 Marsu 2021 hamutuk 415.
Ho kazu ida ne’e, Rui apela ba populasaun hotu, liu-liu iha fatin afetadu,
atu nafatin hakmatek, labele paniku, no importante atu kumpre nafatin regras hodi pratíka medida protoklu ne’ebé ema hotu hatene ona.
