Tuir informasaun ne’ebé jornal INDEPENDENTE asesu husi fonte konfirmadu ida, pesoal saúde balun iha kuarentena iha kapital Dili, kalan-kalan konvida ema balun iha kuarentena hodi ba hemu tua hamutuk.

Fonte ne’ebé hatene moos asaun ne’e dehan, iha kalan bainhira tempu deskansa nian, pesoal saúde balun sei kontatu ema ne’ebé sira konfia ka koñese hodi ba halibur-malu iha kuartu ida atu hemu tua hamutuk.

“Ha’u akompaña kuaze kalan-kalan iha kolega balun mak pesoal saúde kontatu hodi ba hemu tua hamutuk,” informa fonte ne’ebé husu atu labele públika nia identidade ne’e.

Oinsa pesoal saúde sira ne’e bele hetan tua? Fonte ne’e dehan, tua ne’e sosa husi li’ur no balun sosa tuir pesoal polisia ne’ebé halo seguransa iha fatin refere.

“Tua ne’e bele mai husi kintu kantu, mai husi oin, kotuk, bele mós fó osan ba pesoal polisia mak ba sosa no lori tama mai,” dehan nia.

Informasaun husi fonte ne’e hanesan konfirma mós verdade kiik balun ne’ebé viral iha media sosial iha loron hirak ikus.

Iha imajen ne’ebé públika iha media sosial hatudu pesoal mediku balun tuur hamutuk hodi hemu tua. Deskonfia foto refere hasai iha fatin izolamentu Tasi Tolu.

MS husu Deskulpa

Relasiona ho imajen ne’ebé viral iha media sosial, Kordenadór Pilar VII Covid-19, Ministériu Saúde (MS), Nilton do Carmo rekoñese katak pesoal saúde ne’ebé hemu tua hamutuk ne’e iha fatin izolamentu Tasi Tolu.

“Hahalok ida ne’e lolos labele akontese, maibé akontese ona, sai husi ha’u-nia kontrolu, ha’u promete hahalok ida ne’e sei la akontese tan, tanba ita hotu servisu iha ekipa,” dehan nia iha Sala Izolamentu Tasi-Tolu, Tersa (30/03).

Tuir nia, iha situasaun Covid-19 nia laran ema hotu tenke lao tuir regras hirak ne’ebé iha ona, tanba ne’e atu labele halo tan sala ema ida-idak tenke organiza an hodi labele halibur-malu.

“Pessoal hirak ne’e halibur-malu bainhira halo atendimentu ba pasiente hotu ona mak halibur-malu hodi tuur hamutuk no sira mesak pessoal saúde, la inklui ho ema li’ur seluk,” katak nia.

Editor: Jorjino dos santos