Archebispo Metropolitanu Dili, Don Virgílio do Carmo da Silva hatete, tinan ida ona mak pandemia Covid-19 la husik povu no sarani timoroan sira, nune’e mós tinan rua ona igreja katólika iha Timor-Leste la selebra festa paskoa hamutuk ho sarani sira, tanba situasaun pandemia surtu Covid-19.
“Maske iha tinan rua tutuir malu ita labele selebra festa paskoa hanesan baibain, ida-ne’e la hamate ita nia espíritu paskoa nian, no la halakon mós ita nia desezu atu fahe no atu haklaken ksolok paskoa nian ba malu,” dehan nia liu husi komferénsia imprensa, iha Komferénsia Episkopal Timorense (CET) Lesidere, Dili (30/03).
Iha situasaun ne’e Archebispo mós hato’o nia parabens ba sarani Timor-oan tomak iha Timor-Leste no mós sira ne’ebé iha rai li’ur selebra hela festa paskoa ida ne’e.
Ho nune’e Archebispo hakarak fahe mensajem ba sarani tomak relasiona ho loron bo’ot festa paskoa ida ne’e mak, “Jesus Cristo ressuscitou nia moris hikas duni”.
“Hanesan naroman foun ida ne’ebé lori mai ita hotu novidade ida ne’ebé iha nakukun kalan nian, nakukun ne’ebé halo mundu tomak hakdasak ho Covid-19, no Covid-19 obriga ita hotu atu hela iha ida-idak nia fatin, limita ita hotu nia movimentu no sai duni nakukun ida,” nia dehan.
Nia hatutan, mensajem ida ne’e la’ós hada’et hanesan Covid-19, maibé da’et husi fuan ba fuan, basa ema barak nia fuan hela ho novidade ne’e, “kristu mak ha’u-nia esperansa, kristu moris hias ona”.
Automátikamente sei la koalia kona ba formulazia, tanba krstu nia resureisaun la’ós ida-ne’e, maibé kristu nia resureisaun mak vitória domin nian sobre buat aat nia abut no mós laos vitória ida ne’ebé hases ema husi terus sofrementu no mate, maibé liu husi sarani sira nia terus no mate, jesus sei loke dalan iha nakukun nia laran hodi transforma buat ne’ebé aat ba di’ak.
