Kordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araujo hatete, total kazu konfirmadu sura husi loron 21 fulan-marsu 2020 to'o loron 28 fulan-abril tinan 2021 hamutuk 2124.
"Kazu foun ne’ebé relata ohin iha 76 (75 iha Díli, 1 iha munisípiu seluk), iha mane nain 48 no feto 28. Asintomatiku na'in 8 no sintomatiku 68,"dehan nia iha komunikadu (28/04).
Husi total kazu detetadu foun ohin 59 (77,6%) maka deteta liuhusi teste ho razaun atu halo viájen/ka halo ona viájen ba munisípiu hafoin deteta pozitivu. Maski nune’e sira ne’ebé rezultadu teste pozitivu, sira-nia hela fatin iha Díli iha duni cluster sira ne’ebé iha kazu detetadu barak.
Nune'e kazu rekuperadu ohin loron 28 fulan-abril 2021 iha 45 no kazu ativu iha izolamentu hamutuk na'in 1.104.
Husi horiseik (27/04) mai ohin (28/04) teste PCR ne'ebé Laboratóriu Nasionál Saúde halo hamutuk 736 , ho detallu hanesan tuirmai, Vijilánsia sentinela: 5, Rastreiu ba kontaktu (Contact tracing): 38, Rastreiu Aleatoriu (Random Screening): 161, Viájen sai husi serka sanitária husi Dili: 508, Viájen internasionál: 24, Follow up iha kuarentena: 0.
SIJK, ba populasaun iha Timor-Leste laran tomak, favór respeita nafatin regra prevensaun no ijiéne individual ne’ebé Governu hatuur ona atu prevene moras Covid-19 da’et ba mai. Regra sira ne’ebé hanesan ema hotu hatene, uza máskara, fase liman bebeik ho sabaun ka uza dezinfetante ruma, evita kose liman ba matan, inus ho ibun, bainhira kumprimenta malu lapresiza kaer liman, bensa-liman, rei-malu ka hakuak malu, evita halibur malu barak no hamriik ka tuur dook husi ema seluk mínimu metru ida ho balun.
Tuir dadus Covid-19 mundial ne’ebé WHO relata katak, loron kuarta horsehik (27/4), kazu konfirmadu 147,539,302, inklui 3,116,444 mak mate.
Jornalista: Saturnina da Costa
Editor: Jose Sarito Amaral
