Liu husi Dekretu Prezidente Repúblika númeru 23/2021, loron 28 fulan-Abril nomea Deolindo dos Santos nu’udar Prezidente Tribunal Rekursu no Dekretu Prezidente Repúblika númeru 22/2021, loron 28 fulan-abril tina 2021, hafoin rona Governu sira hotu tuir artigu 86, alíña k.

Husi artigu 133, númeru 3, Konstituisaun Repúblika, konjuga ho artigu 12, númeru 1, númeru 2 husi Lei númeru 14/2005, loron 16 fulan- setembru, altera husi Lei númeru 11/2011, 28 setembru (Estatutu Ministériu Públiku) dekreta hodi nomea Alfonso Lopez nu’udar Prokuradór Jerál Repúblika.

Entretantu, Prezidente Repúblika nomea fali Prezidente Supremu Tribunal de Justisa, entre husi juiz sira tuir artigu 86. Aliña J, artigu 124 númeru 3, husi Konstituisaun Repúblika konforme artigu 128, ho inerensia Prezidente Konsellu Superior Majistratura Judisiál.

Artigu 110, númeru 4 husi Estatutu Majistradus Judisiais, kompete ba Prezidente Repúblika nomea Prezidente Tribunal Rekursu.

Estatutu Majistradus Judisiais hateten katak, Konsellu Superior Majistratura Judisial prezididu husi Prezidente Tribunal Rekursu.

Serimónia tomada de posse ba Prokuradór Jerál Repúblika sei hala’o iha oras tuku 9:00 no Prezidente Tribunal Rekursu sei hala’o oras tuku 10:30, iha loron aban (29/04) fatin Palásiu Prezidensial Nicolau Lobato Dili.

Bazeia ba artigu 164, númeru 2 husi Konstituisaun no artigu 110, númeru 1 husi Lei númeru 8/2002, 20 setembru, altera ho Lei númeru 11/2004, 29 dezembru (Estatutu Majistradus Judisiais) ne’ebé estabelese Tribunal Rekursu, enkuantu sai “Instánsia Máxima organizasaun judisiária” eziste iha Timor-Leste, ezerse kompeténsia nu’udar Supremu Tribunal de Justisa to’o nia funsionamentu.

Tanba ne’e, Prezidente Repúblika, tuir artigu 86 aliña J, artigu 124, númeru 3 no artigu 164, númeru 2 husi Konstituisaun Repúblika, no artigu 29, númeru 1, artigu 110, númeru 1 no 4 husi Lei númeru 8/2002, 20 setembru, altera husi Lei númeru 11/2004, 29 dezembru, dekreta hodi nomea Deolindo dos Santos nu’udar Prezidente Tribunal Rekursu. Dekretu ne’e prodús efeitu hahú husi loron 29 fulan-abril 2021.

 Dr. Deolindo dos Santos hetan posse husi Presidente Repúblika ba mandatu dahuluk iha loron 28 fulan-Abril 2017 hodi troka Guilhermino da Silva ne’ebé rezigna an tanba kestaun saúde.

Jornalista: Novis Do Carmo Vieira

Editor: Jose Sarito Amaral