Molok ne’e Prezidente Republika dekreta ona extensaun estadu emerjensia ba dala-12, hahú iha oras 00:00 loron 2 fulan-abril no sei termina iha oras 23:59 loron 3 fulan-maiu.
Relasiona ho numeru kazu ne’ebé kada loron aumenta no Timor-Leste iha ona transimisaun komunitaria, nune’e Parlamentu Nasional (PN) autoriza Prezidente Repubika atu extende tan estadu emerjensia ba loron 30, hahú iha oras 00:00 loron 3 fulan-maiu to’o oras 23:59 loron 1 fulan-juñu tinan 2021.
“Lei autorizasaun ba extensaun estadu emerjensia pasa ho rezultadu votasaun deputadu 59 prezente, votus afavor 43, kontra 0, abstensaun 16,”dehan Prezidente Parlamentu Nasional, Aniceto Guterres, kuarta ohin, hafoin aprova extensaun EE, iha plenaria PN, (28/04).
Deputadu Luis Roberto husi bankada KHUNTO votus afavor, nune’e nia husu ba Ministeriu Saúde atu halo sosializasaun ba populasaun sira bele partisipa iha vasinasaun hodi hasa’e imunidade kombate surtu Covid-19.
Entretantu, Deputadu husi bankada PD, Mariano Asanami Sabino vota ho votus afavor.
Nune’e nia husu mós ba saúde publiku no governu atu seriu hodi halo jestaun di’ak hodi redus numeru Covid-19 iha Timor-Leste.
Tuir dadus Covid-19, kinta ohin (28/4) kazu foun hamutuk na’in 76, rekuperadu 45, total pasiente iha izolamentu na’in 1,104.
Jornalista: Saturnina da Costa
Editor: Jose Sarito Amaral
