“Tuir fila-fali analiza ne’ebé mak halo entre loron 16 to’o loron 22 durante semana ida, prevalensia sa’e ba 7.3%.

“...se 7.3% toda populasaun ne’ebé mak infetadu ekivalensia 100 mill, signifika katak iha Dili 300 mill multiplika ba 7.3%, purvolta 21 mill kazus ne’ebé mak eziste iha Dili laran, maibé deteta de’it 1.495 durante loron 52,” deklara nia iha Parlamentu Nasionál, Kuarta (28/04).

Relasiona ho kazu ida ne’e, Pedro hatete, SIJK iha opsaun tolu (3).

Opsaun dahuluk mak aseita normalidade foun, katak lalika halo serka sanitaria, lalika halo konfinamentu domisiliáriu jerál, lalika halo proibisaun aglomerasaun, lalika halo aulas eskola nian, lalika halo atividades relijiozus, lalika mós fó subsídiu agregadu familiár ba familia ne’ebé mak laiha rendimentu fiksu.

“Maibé bele halo de’it mak detensaun rastreia, halo tratamentu, halo de’it medidas prevensaun no ijiene pesoál, halo de’it fiskalizasaun ba iha fatin públiku hotu-hotu,” dehan nia.

Opsaun daruak, nia dehan, presiza halo serka sanitaria, maibé lalika iha konfinamentu domisialiária, lalika halo prevensaun aglomerasaun, lalika halo prevensaun aulas prezensiais, lalika iha proibisaun ba selebrasaun relijiozas, tenke fó subsidiu agregadu familiár ba familia ne’ebé laiha rendimentu fiksu, tenke halo deteta kazus, halo medidas prevensaun no halo fiskalizasaun.

Ba opsaun datoluk, Klamar Fuik dehan, konfinamentu domisiliáriu jerál iha Dili, halo serka sanitaria, halo konfinamentu domisiliariu, halo proibisaun aglomerasaun, halo proboisaun aulas,  halo proibisaun atividades relijiozus, fó subsidius agregadu familiár, halo deteta kazus, halo medidas preventiva no  ijiene pesoál , no tenke halo prosesu fiskalizasaun.

“Ikus liu mak tuir sala situasaun no Sentru Integradu ba Jestaun Krize nia intendimentu propoin no rekomenda katak opsaun di’ak liu mak opsaun dois no tres,” dehan nia.

Maske nune’e, nia dehan, fator determinante atu bele iha susesu ba kombate Covid-19 mak iha unidade pensamentu husi líder istóriku no líder nasionál hotu, no presiza fó subsídiu ba agregadu familiár ne’ebé mak laiha rendimentu fiksu.

“Tanba susesu sei marka kredibilidade prestiziu ba nasaun, derota hanesan falta responsabilidade hotu-hotu nian perante nasaun no perante komunidade internasionál,” dehan Klamar Fuik.

Iha fatin hanesan, Prezidente Bankada KHUNTO, Olinda Guterres  husu ba governu atu blokeia Dili, tanba númeru pozitivu Covid-19 sa’e maka’as.

“Ita koko took fulan ida blokeia Dili laran ne’e, ita haree took, buat ida Covid-19 ne’e sei iha ka laiha ona,” dehan nia.