Kordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, kazu foun ohin iha mane na’in 32 no feto na’in 16.
“Husi kazu foin ne’ebé deteta ohin loron iha 48 (100%) asintomatiku,”dehan nia iha komunikadu,(02/05).
Nia relata, total kazu detetadu foun ohin iha na’in 15 (31,2%) mak deteta liuhusi teste ho razaun atu halo viájen ka halo ona viájen ba munisípiu ka estranjeiru, hafoin deteta positivu. Sira ne’ebé rezultadu teste positivu, sira-nia hela fatin iha Díli iha duni cluster sira ne’ebé iha kazu detetadu barak.
Enkuantu, komulativu kazu konfirmadu sura husi loron 21 fulan-marsu tinan 2020 to’o loron 2 fulan- maiu tinan 2021 hamutuk 2.444.
Ho nune’e kazu foun ne’ebé relata ohin hamutuk 48 (46 iha Díli no 2 iha munisípiu seluk). Idade tinan 12 mai kraik na’in 1, idade tinan 12-59 na’in 45 (93,7%) no idade 60 ba leten iha na’in 2.
Husi horiseik (01/05) mai ohin (02/05) teste PCR ne'ebé Laboratóriu Nasionál Saúde halo hamutuk 579, ho detallu hanesan tuir mai, Vijilánsia sentinela 36, Rastreiu ba kontaktu (Contact tracing) 87, Rastreiu Aleatoriu (Random Screening)137, Viájen sai husi serka sanitária husi Dili 306, Viájen internasionál 4 no Follow up iha kuarentena 9.
Entretantu, total testes PCR ne’ebé halo horiseik (01/05) iha munisípiu sira seluk hamutuk 257 ho detalle hanesan tuir mai, Maliana 19, Viqueque 3, Baucau 111, Mliana 19, Teste follow up ba sira iha izolamentu 48 hatudu katak, 24 negativu ona, 24 sei nafatin pozitivu.
SIJK mós nafatin apelu ba populasaun iha Timor-Leste laran tomak, favór respeita nafatin regra prevensaun no ijiéne individual ne’ebé Governu hatuur ona atu prevene moras Covid-19 da’et ba mai.
Regra sira ne’e hanesan ita hotu hatene ona maka, uza mascara, fase liman bebeik ho sabaun ka uza dezinfetante ruma, evita kose liman ba matan, inus ho ibun, bainhira kumprimenta malu lapresiza kaer liman, bensa-liman, rei-malu ka hakuak malu, evita halibur malu barak no hamriik ka tuur dook husi ema seluk mínimu metru ida ho balun.
Jornalista:Saturnina da Costa
Editor:Jose Sarito Amaral
