Kordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, kazu foun ohin iha mane na’in 62 no feto na’in 58.
“Husi kazu foin ne’ebé deteta ohin loron iha 114 (95%) asintomatiku no na’in 6 mak sintomatiku,”dehan nia iha komunikadu,(01/05).
Nia relata, total kazu detetadu foun ohin iha na’in 51 (42,5%) mak deteta liuhusi teste ho razaun atu halo viájen ka halo ona viájen ba munisípiu hafoin deteta positivu. Sira ne’ebé rezultadu teste positivu, sira-nia hela fatin iha Díli iha duni cluster sira ne’ebé iha kazu detetadu barak.
Enkuantu, komulativu kazu konfirmadu sura husi loron 21 fulan-marsu tinan 2020 to’o loron 1 fulan- maiu tinan 2021 hamutuk 2396.
Ho nune’e kazu foun ne’ebé relata ohin hamutuk 120 (116 ha Díli 4 iha munisípiu seluk), kazu rekuperadu na’in 43 no kazu ativu iha sala izolamentu lima hamutuk na’in 1,1239.
Husi horiseik (30/04) mai ohin (01/05) teste PCR ne'ebé Laboratóriu Nasionál Saúde halo hamutuk 1169, ho detallu hanesan tuir mai, Vijilánsia sentinela: 70, Rastreiu ba kontaktu (Contact tracing): 147, Rastreiu Aleatoriu (Random Screening): 334, Viájen sai husi serka sanitária husi Dili: 575, Viájen internasionál: 8 no Follow up iha kuarentena: 55
Total testes PCR ne’ebé halo horiseik (30/04) iha munisípiu sira seluk hamutuk 328 ho detalle hanesan tuir mai, Maliana: 42, Viqueque: 51, Suai: 20, Baucau:165, Ermera: 50, Teste follow up ba sira iha izolamentu: 62 (43 negativu ona, 19 sei nafatin pozitivu).
Evulusaun surtu Covid-19 iha munisipiu Dili no munispiu sira seluk no RAEOA atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-nain epidemiolojia nian uza, mak insidénsia.
Konvensionalmente insidénsia sukat totál kazu foun kada loron pur mil abitantes, no hatudu risku ne’ebépopulasaun iha atu hetan da’et moras ida.
Informasaun husi Izolamentu iha loron 1 fulan-maio, iha Izolamentu vera Cruz halo tratamentu ba kazu detetadu na'in 28. Iha área obstetrisia na'in 8, sirurjia 1, medisina interna 16 no pediatria 3.
Sira na'in 8 iha obstetrisia kategoria moderadu hotu, sira-nia kondisun estável.
Kazu sirurjia 1 tanba asidente tránzitu no iha ‘’Severe Head Injury’’ ho detetadu pozitivu Covid-19, oras ne’e dadaun uza oksijéniu.
Enkuantu sira na'in 16 iha medisina interna, 10 grave, 6 moderadu. Husi grupu grave, 1 uza ventiladór ho trakeostomia, na'in 9 seluk uza oksijéniu.
No mós kazu 3 pediatria, 2 moderadu, 1 grave. Na'in 1 grave uza CPAP, no 2 moderadu lauza ona oxijéniu.
Sala Izolamentu Vera Cruz hatudu katak bainhira ema barak liu detetadu pozitivu, sei baixa ho kategoria moderadu no grave.
SIJK informa mós ba públiku katak, husi loron 1 to’o loron 30 fulan-abril tinan 2021, iha ema na’in 59 mak hetan autorizasaun halo auto-Izolamentu ka Izolamentu terapéutiku obrigatoriu iha uma-rasik, tuir regras ne’ebé governu define ona. Husi total kazu ne’e iha na’in 7 mak rekuperaadu ona.
Aproveita mós informa katak, maske iha uma-rasik maibé tenki prienxe kritériu mínimu ema ne’ebé sintomátiku lijeiru, ka iha moras seluk no komorbidade sei lahetan autorizasaun atu halo auto-izolamentu.
SIJK mós nafatin apelu ba populasaun iha Timor-Leste laran tomak, favór respeita nafatin regra prevensaun no ijiéne individual ne’ebé Governu hatuur ona atu prevene moras Covid-19 da’et ba mai.
Regra sira ne’e hanesan ita hotu hatene ona maka, uza mascara, fase liman bebeik ho sabaun ka uza dezinfetante ruma, evita kose liman ba matan, inus ho ibun, bainhira kumprimenta malu lapresiza kaer liman, bensa-liman, rei-malu ka hakuak malu, evita halibur malu barak no hamriik ka tuur dook husi ema seluk mínimu metru ida ho balun.
Dadus mundial Covid-19 kazu foun na’in 150,110,310 no mate hamutuk 3,158,792.
Jornalista:Saturnina da Costa
Editor:Jose Sarito Amaral
