Arão: Loloos Ezije Prado Tuan Featured

By INDEPENDENTE Outubru 29, 2018 3224
Prezidente Parlamentu Nasionál, Arão Noe de Jesus, Prezidente Parlamentu Nasionál, Arão Noe de Jesus,

DILI: Asaun pasifika ne’ebé Movimentu Universitáriu Timor Leste (MUTL) halo, loloos ezije ba deputadu tuan nune’e entrega karreta Prado tuan. Labele ko’alia kona-ba planu akizisaun karreta foun tanba deputadu atuál sira presiza viatura foun halo fiskalizasaun iha terrenu.

Prezidente Parlamentu Nasionál, Arão Noe de Jesus, hateten, asaun pasifika ne’ebé MUTL halo ba PN diretu estudante sira nian, maibé deputadu foun V lejizlatura iha diretu hetan karreta foun atu fasilita servisu.

Nia esplika, karreta Prado hamutuk 30 resin mak seidauk entrega, Konsellu Administrasaun PN haruka ona karta despaxu ba eis-deputadu sira. Ne’e duni, di'ak liu MUTL sira husu ba eis-deputadu sira.

“Podia Estudante sira halo asaun pasifika ba eis-deputadu sira hodi ezije ba sira tanba saida mak la entrega Prado tuan sira ne’e”, tenik nia, iha edifísiu Ministériu Finansas, Sesta (26/10).

Tuir Arão, asaun ne’e labele ba PN, tanba esforsa Konsellu Administrasaun haruka ona karta ba eis-deputadu no mós dirijente partidu sira maibé seidauk iha resposta.

Nia deklara, hanesan Prezidente ho membru meza PN nian iha diretu no responsabilidade planeia sosa viatura foun ba deputadu V lejizlatura fasilita sira halo fiskalizasaun.

Tokon $16.1 Inklui Sosa Karreta Trasaun

Arão Nóe dehan, Parlamentu Nasionál propoin orsamentu tokon $16.1 ba orsamentu privativu ne’ebé sei rezolve ba besn servisu kapitál menór no saláriu vensimentu PN nian, ne’ebé inklui sosa karreta foun.

“Orsamentu ne’e mós atu aloka hodi sosa karreta foun ba deputadu V lejizlatura sira, deputadu tuan kontinua uza Prado tuan. Tanba ne’e, ami planeia sosa karreta foun ba sira”, dehan nia.

Arão-Angelina Sai Alvu

Entretantu, asaun manifestasaun ne’ebé organiza husi MUTL hala’o lider PN na’in rua, Arão Noe de Jesus no Maria Angelina Sarmento sai alvu.

Manifestante sira leba kaixaun ne’ebé foru ho hena metan, taka imajen Presidente PN Arão Nóe no Vise-Prezidente PN, Maria Angelina Sarmento, hanesan jestu ida hodi kontra desizaun sosa viatura foun.

Asaun Pasifika ba loron dahuluk ne’e envolve movimentu universitáriu husi munisípiu 12 inklui mós Rejiaun Administrativa Espesiál Oekusi-Ambenu (RAEOA).

Iha asaun ne’e, estudante sira hakerek ‘spanduk’ hatete, “fó fila povu nia karreta, MUTL rejeita sosa karreta foun ba deputadu sira, deputadu kaan-teen, matan naklosu ba karreta luxu”.

Iha asaun ne’e, manifestante sira hatudu jestu oioin hanesan leba kaixaun, prega krús hodi hakerek Presidente PN no nia Vise nia naran sunu lilin, tau ai-funan hale'u kaixaun. Balun tuur hakuak kaixaun tanis, reza no hananu ba ema mate nian.

Portavós MUTL, Noe Bernadino Ximenes hatete, jestu ne’ebé manifestante sira halo atu hatudu deputadu sira iha PN sira nia fuan mate ona, matan taka la hatene loke ona no tilun labele rona ona povu ne'ebé kiak ba bee moos, eskola laiha kondisaun, ekipamentu saúde la sufisiente.

“Ami haree povu sei mukit maibé ukun na'in halo desizaun hodi benefísia-aan rasik hodi husik hela injustisa sosiál buras nafatin iha sosiedade nia leet”, dehan nia.

Ezijénsia MUTL hasoru PN ne’e iha buat rua, labele sosa karreta foun no rekolla hikas karreta Prado tuan ne’ebé eis-deputadu sira uza, maibé seidauk entrega.

Nia hatete, asuntu karreta ne’e insiste beibeik ona hahú kedas iha 2017 atu husu PN dada hikas karreta tuan, maibé laiha no ohin sira deside fali ona atu sosa viatura foun ne’e hatudu polítika inkonsistente.

PR Lú Olo La Simu Informasaun PN Sosa Karreta Foun

Kona-ba asaun pasifika ne’ebé sosiedade sira halo hodi kontra PN, Prezidente Repúblika (PR), Francisco Guterres, ‘Lú Olo’ hateten, seidauk simu informasaun ofisial kona-ba sosa karreta foun husi Prezidente PN.

PR Lú Olo hateten, lei fó dalan ba asaun ne’ebé estudante halo atu bele espresa sira-nia hanoin, tanba ne’e Parlamentu Nasionál tenke fó preokupasaun ne’e.

“Ita espera saida maka atu bele ne’e Parlamentu Nasionál bele responde ba estudante sira”, dehan nia.

Asaun manifestasaun MUTL hahú iha Sesta (26/10), envolve husi universidade hotu iha Dili laran, ne’ebé kontra desizaun PN atu sosa karreta foun ba deputadu sira ho marka Pajero.

Rate this item
(0 votes)

Independente Digital TV