TL sei Izola-Aan Husi Mundu Featured

By Cristina Ximenes Outubru 26, 2018 2162

DILI: Polítika ‘vinga-malu’ interna Timor-Leste ninian neineik sei lori nasaun ne’e ba dezastre boot. Desizaun Parlamentu Nasionál (PN) hodi lakohi aseita Xefe Estadu atu partisipa iha eventu internasionál sira hanesan asaun boikota ne’ebé Estadu Timor-Leste halo.

Ne’e duni, indiretamente neineik-neineik mundu tomak sei izola Timor-Leste, tanba laiha partisipasaun ba eventu importante sira.

Peskizadór Asia Justice and Rights (AJAR), Inocêncio de Jesus Xavier, hateten, desizaun ne’ebé deputadu PN hola ba Prezidente Repúblika (PR), Francisco Guterres ‘Lú Olo’, hodi kansela viajen Bali Indonézia hanesan rai ne’ebé izoladu iha mundu nia-matan.

“Desizaun ne’e bele izola ita nia rain TL husi mundu”, dehan nia, iha kna’ar fatin, Faról, horisehik.

Nia dehan, bainhira Prezidente Repúblika, Francisco Guterres ‘Lú Olo’ uza osan Estadu nian ba vizita partikulár ne’e deputadu sira bele hapara, maibé tanba konvite maka atu ba reprezenta Estadu laiha razaun atu hapara.

Tuir nia, razaun tanba kandidatu membru governu seidauk simu pose maka deputadu kansela viajen Prezidente Repúblika nian, ne’e desizaun ne’ebé la ajuda Estadu hodi lori Timor nia naran ne’e ba iha rai li'ur.

Nia dehan ema na’in sia ne’e maka ba tuur iha ministériu mós sei la muda Timor sai hanesan Singapura. Nune’e, iha matenek barak iha partidu CNRT nia laran hodi bele halo nomeasaun ba sira.

Ne’e duni, Inocêncio sujere, tenke interpreta prinsípiu separasaun podér ho prudente. Polítika bele halo iha eleisaun tempu kampaña maibé tempu to’o ona kaer ukun halo polítika Estadu ba nesesidade povu.

Iha fatin seluk, Koordenadór La’o Hamutuk (LH), Celestino Gusmão, hateten, desizaun PN nian hatudu sinál estabilidade polítika ladún di’ak iha Timor, liu-liu relasaun ho kolaborasaun órgaun soberanu sira nasaun nian.

Nia esplika, ne’e sinál instabilidade polítika ne’ebé bele prejudika mós ba OJE 2019 ne’ebé la kleur tan atu diskute iha Uma Fukun PN. Tanba Prezidente Repúblika nia pozisaun importante tebes hodi bele halo promulgasaun.

“Ita hotu espera katak Prezidente Repúblika labele halo kontra-atake ne’ebé bele kontribui ita nia estabilidade ne’e sai la di’ak liután”, hateten nia.

Afeta Polítika Esterna

Entretantu, observadór polítika husi Universidade Timor Lorosa’e (UNTL), Camilo Ximenes hatete, polítika nasaun nian iha buat rua ne’ebé tenke halo maka polítika esterna no interna.

Maski nune’e, haree ba vontade polítiku na'in sira nia iha uma fukun PN ne’e la hatudu sinál di'ak ida husi polítika esterna no interna, tanba iha rai laran mós sira ida-idak sempre defende interese partidáriu.

Iha nasaun ne’e Xefe Estadu mak ema númeru ida atu lori Estadu nia-naran ba halo kooperasaun bilaterál ho nasaun seluk, maibé nia-viajen ne’e sempre impede husi PN.

Tuir nia, situasaun polítika atuál presiza konsensu hodi hataan ba situasaun iha rai laran no rai li'ur, hanesan retifikasaun ba tratadu Fronteira Marítima, sosa asaun ConocoPhillips no adezaun ba ASEAN.

“Atu responde polítika esterna no interna hodi atinje objetivu polítika nasaun nian sira tenke hamutuk”, dehan nia, iha Kampus UNTL, Kaikoli, horisehik.

Nia hatete, konferénsia internasionál ida iha Amérika tuir loloos PR tenke prezensa maibé la akontese, hanesan mós iha Bali, nune’e bele hametin relasaun ho nasaun sira iha ASEAN hodi fortifika polítika Timor nian atu adera ba organizasaun ASEAN, maibé infelizmente deputadu sira la fó aseitasaun.

Iha fatin hanesan, observadór polítika husi UNTL, Vitor Soares hatete, kanselamentu viajen PR nian ne’e hanesan polítiku kontra polítiku, tanba Xefe Estadu pondera naran membru governu na’in sia entaun PN mós deside kansela viajen.

Atu hametin soberania tuir loloos ne’e órgaun soberania haat ne’e tenke hamutuk hodi hala’o ida-idak nia funsaun tuir konstituisaun haruka.

“Konvite tolu ne’ebé mai husi Portugál, Amérika no Indonézia Estadu la responde ne’e ita lakon pontu boot husi relasaun polítika esterna nian”, dehan nia.

Prosesu diplomasia iha rai li'ur ne’e lider nasionál sira hatene di'ak tanba uluk sira hakarak atu hasoru hasoru diplomata importante ruma difisil tebes, maibé ohin loron sira rasik konvida maibé la ba.  

Rate this item
(0 votes)

Independente Digital TV