“Favór selu favór, hamosu nepotizmu no sira ne’ebé hetan benefísiu tuur nonook de’it. Mosu elite riku, katak ema uitoan de’it ne’ebé riku ba beibeik enkuantu maioria kiak ba beibeik”, tenik nia, iha Otél Timor, Sesta (26/10).

Nia haktuir, korrupsaun buras iha servisu públiku, nune’e servidór públiku balun simu vensimentu ki'ik hatudu sinál boot halo korrupsaun. Sinál balun maka iha karreta luxu no harii uma boot, ba rai li'ur beibeik nu’udar turista.

“Ha’u hanoin la'ós susar atu kaer hetan servidór públiku sira ne’ebé uza riku-soin Estadu nian hodi hariku aan ba beibeik”, dehan PR Lú Olo.

Nia hatutan, bainhira iha vontade polítika husi lider sira ukun na’in no responsavel prinsipál sira atu harii sistema ne’ebé bele buka tuir no kaer hetan sira ne’ebé uza riku-soin Estadu nian hodi hariku-aan.

Nia akresenta, presiza hatuur sistema liu husi dalan legál atu servidór públiku no sidadaun bele hatene saida maka akontese ba sira bainhira kaer hetan halo korrupsaun.

“Se ita la halo buat ida ka taka matan no la denunsia. Tanba korrupsaun ne’e família ida ka belun ida ka ita rasik hakarak hetan mós benefísiu ruma, moras boot ne’e sei da'et ba beibeik no harahun ita nia dignidade nu’udar ema no nu’udar nasaun”, akresenta PR Lú Olo.

Iha biban ne’e, Xefe Estadu hateten, lansamentu ba manuál treinamentu CEPAD di’ak tebes tanba sai mata-dalan ba servidór públiku atu oinsá serve sidadaun ho di’ak bainhira husu informasaun kona-ba servisu Estadu nian.

PR Lú Olo kongratula CEPAD no ajénsia internasionál sira ne’ebé fó liman ba timoroan atu lori ba oin projetu ne’ebé hahú iha Timor-Leste iha 2007 no hala’o ona inisiativa barak ho susesu.

CEPAD harii husi timoroan sira husi grupu kiik ne’ebé fó-aan tomak atu ajuda Estadu harii, habelar no hametin ba bei-beik kondisaun ne’ebé importante tebes ba dezenvolvimentu no moris di’ak.