“Ami lakon konfiansa ba Arão Noe, tanba husi tempu bainhira V Lejislatura ida ne’e hahú, Parlamentu Nasionál hatudu kedas katak iha defisiensia makaas iha Parlamentu Nasionál nia funsionamentu,”dehan Vise-Prezidente Bankada PLP, Francisco de Vasconcelhos, liu husi konferensia impresa, iha sala Bankada FRETILIN, kinta (06/05).
Tuir nia, husi tinan-2018 to’o ohin loron, Parlamentu Nasionál seidauk konsege finaliza lei importante no nesesariu sira hanesan, ezemplu ida, Lei Anti Korupsaun. Parlamentu la konsege finaliza Lei importante ida ne’e liu tinan rua ona.
“Tanba inkapasidade Prezidente Parlamentu nian atu haka’as aan no lidera hodi garante parlamentu funsiona ho normal no funsiona ho di’ak,”dehan nia.
Hanesan públiku tomak akompaña, didiak katak maioria husi sesaun plenaria parlamentu nian hala’o de’it no periódu antes de orden do dia.
Tanba Parlamentu Nasional laiha ajenda propriu ba sesaun plenaria sira, ho inkapasidade Prezidente Parlamentu Nasionál nian.
“Parlamentu Nasionál nia lalaok iha tinan rua ikus ne’e hatudu momós katak Arão Noe laiha kapasidade lideransa ne’ebé presiza bainhira okupa kargu nuudar prezidente ba segundu orgaun soberania ita nia rain nian mak Parlamentu Nasionál,”deha nia.
Ho nune’e, Bankada parlamentár tolu, PLP, FRETILIN no KHUNTO hakarak atu mai informa públiku tomak katak horseik, loron-5 fulan-Maiu tinan-2020, hatama tiha ona pedidu ba meza Parlamentu Nasionál atu husu ajendamentu ba votasaun ba destituisaun Prezidente Parlamentu Nasionál ida agora.
