Tersa-horsehik Presidente Bankada CNRT, Duarte Nunes hamutuk ho nia membru sira halo deklarasaun hodi husu FRETILIN tuur hamutuk ho CNRT buka solusaun ba situasaun politika rai laran.
Entretantu, kuarta ohin, Konsellu Politika Nasionál (CPN)-Partidu CNRT halo fali deklarasaun kontraversu katak sei foti medidas ba aktu deputadu Bankada CNRT nia deklarasaun iha Parlamentu Nasionál.
“CPN sei hola medidas no husu responsabilidade ba Deputadus CNRT sira ne’ebé halo konferensia de imprensa iha 5-fulan maiu (horisehik),”dehan Segundu Vise-Prezidente Partidu CNRT, Virgilio Smith, liu husi konferensia imprensa, iha Sede CNRT, Bairru Grilhos, Kuarta (06/05).
Nia hatutan, Konsellu Politika Nasionál ho estrutura tomak partido nian afirma nia konfiansa tomak no sem reserva ba Presidente P-CNRT Maun Boot Kay Rala Xanana Gusmão.
Partidu liu husi CPN konsidera deklarasaun konferensia imprensa ne’ebé Deputado CNRT sira halo iha horisehik (Tersa) iha PN laiha orientasaun no desizaun partidu nian.
“CPN konsidera deklarasaun husi deputados CNRT sira nian hanesan atus individuais, la representa partido nia pozisaun,”nia hateten.
Tanba, ne’e reafirma dezisaun CPN iha loron 30 fulan-Abril 2020 atu fó apoiu tomak no autoriza Presidente Partidu CNRT atu representa CPN no partidu hodi hola medida no dezisaun kona-ba situasaun politika atual.
Nune’e CPN reafirma nia pozisaun no apoiu tomak ba Petisaun ne’ebé hatama ona ba Supremu Tribunal no Justisa ka TR horisehik.
Tanba ne’e, CPN-Partidu CNRT no estrutura Nasional to’o munisipiu no Prezidente Partidu CNRT Maun Boot Kay Rala Xanana Gusmo hodi representa partidu baseia ba desizaun niaan iha 30 Abril 2020.
Enkuantu konferensia imprensa tersa-horsehik hala’o iha Parlamentu Nasionál mak hanesan Deputadu Duarte Nunes aliende Presidente Bankada CNRT iha Parlamentu Nasionál, nia mós nuudar membru CDN-CNRT, José Virgilio Fereira hanesan Vise Presidente Bankada CNRT nia mos nuudar Presidente Juventude Nasionál CNRT, no Deputadu Patricinio Fernandes nuudar Kordenadór P-CNRT Munisipiu Manufahi.
