“Proposta no opiniaun balun mai ona. En-prinsípiu atu to’o iha ne’ebá, agora ita hatene katak kampu ne’e aproxima ona fin-du-produsaun. Ita presiza foti desizaun ida kuidadu, nune’e ami halo hela ami estudu no analiza avaliasaun tomak ba iha nia parte komersiál no téknika atu bele foti desizaun ida di'ak,” dehan nia, iha Palasiu Governu, Kuarta (19/8).

Nune’e, atuál Prezidente ANPM ne’e fiar sei ko'alia didi'ak ho kompañia Santos, karik ikus desizaun ne’e tun bele favorese atu governu labele lakon, tanba rejime adota rekuperasaun katak sei rekupera empreza nia despeza.

“Agora parte téknika sei haree uluk estudu ba rezerva, atu haree númeru ne’ebé fó husi kompañia Santos ne’e pertinente duni ka lae, sei sujeita ba estudu termina tiha bele dehan katak desizaun ne’ebé foti reflete duni vantajen ba estadu,” tenik nia.

Fatin hanesan, Ministru Petróleu Minerais (MPM), Vitor da Conceição hateten, programa sira ne’ebé durante ne’e la’o, maibé agora projeta ba tinan 2021 mak laiha diferensa boot ida kontinua nafatin ekilíbriu, iha aumenta uitoan maibé laiha mudansa barak orsamentu ladún boot.