“Impase polítika ne’ebé la’o daudaun ne’e tanba maun boot na’in tolu nia sala, ida maka Maun Boot Xanana, segundu atuál Primeiru Ministru, Taur Matan Ruak, terseiru atuál Prezidente Repúblika, Francisco Guterres Lú Olo,” dehan veteranu Alin Laek, iha Kuartél Jerál, Fatuhada, horisehik.

Nia hatutan, politikamente lider na’in rua, Lú Olo ho Kay Rala Xanana fila kotuk ba malu hodi la konsege halo konsensu hodi dezenvolve nasaun ne’e ba oin.

Maski lider rezisténsia sira ne’e agora daudaun sei iha diferensa hanoin kona-ba prosesu konstrusaun Estadu ne’e, maibé husu ba ema seluk atu labele tau sira-nia kanuru tohar.

“Haree politikamente lider na’in rua fó kotuk ba malu ne’e hanesan polítika ida, husu atu bibi aman ida atu labele tama iha klaran,” tenik nia.

Nia salienta, uluk lider atuál sira ne’e hanesan Komandu luta, sira maka hanesan FALILINTIL, mai kaer soberanu rua Prezidente no Governu, maibé insusesu tanba uluk sira iha ai-laran veteranu sira ne’ebé la hatene buat ida maka fou susesu ba sira.

“Ami beik-teen sira ne’e maka fó susesu ba sira, ami fó moto mós ba sira ho títulu tolu, lutadór, libertadór, no fundadór, maibé kuandu ukun-aan ona tun mai vila laran, soe tia ami ida uluk terus hamutuk ho sira ne’e, no haruka ema osan barak maka ba hale’u sira,” tenik nia.

Tanba ne’e, hateten ba sira, uluk funu sira buti oho inimigu bele, maibé sira mai atu kolia kona-ba povu nia vida moris ne’e sira labele, tanba sira laiha ona kapasidade atu bele rezolve povu nia halerik ba povu nia moris.

Nia konfesa, ema hotu moris iha demokrasia nia laran, liberdade espresaun, liberdade asosiasaun, liberdade sirkulasaun, buat hotu ne’ebé akontese la’o hanesan ne’e, tanba husu ema hotu akompaña lider sira-nia polítika.