Haree husi postura estrutura VII Governu Konstitusionál bokur tebes ho totál membru governu hamutuk 33. Ne’e duni, governasaun foun AMP tenke buka meius oinsá atu bele redús.

“Mínimu ne’e to’o 20, atu nune’e ita labele gasta osan barak liu”, dehan Manuel, iha knaar fatin Praia Coqueirus, horisehik.

Iha fatin ketak, observadór polítika, Camilo Ximenes hatete, partidu ne’ebé de’it mak atu ka’er governu tenke iha responsabilidade, nune’e gasta orsamentu estadu ho efisiente no efikásia.

“Karik ita hakarak halo poupansa ba Orsamentu Estadu, ita halo ki'ik estrutura VIII Governu”, dehan nia.

Nia hatutan, estabelesimentu estrutura governu kada ministériu tenke haree ba ministériu ida labele iha ministru, vise-ministru no sekretáriu estadu. Nune’e, iha tan diretór jerál no diretór nasionál. Ne’e hatudu postura la efisiente ona.

Tanba ne’e, di’ak liu maka hamenus estrutura governu, karik iha ona ministru no vise-ministru lalika iha tan sekretáriu estadu. Kompleta de’it ho diretór jerál ida atu bele fahe servisu ho di'ak nune’e bele poupa osan estadu.