Polisia Migrasaun Aprezenta Kazu Subornu Rua ba MP Featured

By Tomé Amado Maiu 18, 2018 1551
Ilustrasaun asaun subornu Ilustrasaun asaun subornu

DILI: Servisu Polisia Migrasaun (SPM) aprezenta kazu subornu rua ba Ministériu Públiku (MP), ne’ebé deskonfia envolve timoroan no ema estranjeiru.

Diretór Operasaun Servisu Migrasaun Polisia Nasionál Timor-Leste (PNTL), Inspetór Xefe Fortunato Guterres hateten, iha ema estranjeiru balun fó osan ba timoroan balun hodi bele hetan legilidade vistu servisu iha Timor-Leste.

Ami deteta kazu rua ne’ebé envolve ema na’in 10 (timoroan) simu subornu husi ema estranjeiru sira”, dehan nia, iha edifísiu Ministériu Defeza Seguransa (MDS), Vila-Verde, horisehik.

Aktu ne’e krime SPM ho Sekretáriu Estadu Juventude no Traballu (SEJT) identifika hafoin halo inspesaun ba ema estranjeiru sira iha rai laran, perante tempu kampaña.

Ne'e duni, SPM halo partisipasaun no aprezenta kazu rua ne’e ba ministériu públiku hodi prosesa ba oin.

Fortunato dehan, nu’udar instituisaun seguransa ne'ebé tutela ba servisu migrasaun nian, buka atu hamate sistema aat sira ne'ebé buras hela iha nasaun ne’e.

SPM sei kontinua akompaña nafatin prezensa ema estranjeiru sira ne’ebé mai iha Timor-Leste. Tanba iha indísiu ema rai li'ur sira mai buka servisu iha nasaun ne’e la liu husi prosedimentu legál.

Rate this item
(0 votes)

Independente Digital TV