AMP-FRETILIN-PD Hakarak Pás no Estabilidade Featured

By INDEPENDENTE Maiu 09, 2018 1267
Lider FRETILIN, AMP no PD Lider FRETILIN, AMP no PD

DILI: Finalidade husi prosesu kampaíña eleitorál akontese insidente ne’ebé envolve militante no simpatizante husi partidu polítiku sira. Maski nune’e, partidu politiku sira orienta nafatin ba sira nia militante no simpatizante sira atu hametin nafatin pás no estabilidade iha nasaun ne’e.

Ne’e duni, partidu boot sira hanesan koligasaun Aliansa Mudansa ba Progresu (AMP), partidu FRETILIN no Partidu Demokrátiku (PD) bolu nafatin atensaun ba militante sira atu tuur hakmatek hodi akompaña prosesu demokrasia ne’e.

Jornada ikus komísiu kampaíña partidu koligasaun AMP deklara atu povu iha nasaun ne’e moris nafatin iha pás no seguransa nia laran hodi bele hateke ba prosesu dezenvolvimentu nasaun nian.

“Hau Konvida ruin sira naklekar iha tasi laran ai-laran ho matebian, rai lulik ho fatuk lulik ho Na’i Maromak, ha'u konvida imi mai hamutuk ho ami hodi hametin pás ho estabilidade nia laran", dehan Prezidente AMP, Kay Rala Xanana Gusmão, iha Tasi Tolu, horisehik.

Xanana husu ba Joven ho povu tomak hamutuk hodi dezenvolve Timor-Leste atu sai sidade ne'ebé furak liu.

 Povu Ezije Estabilidade Seguransa

Durante fulan partidu FRETILIN hala’o ninia kampaíña hadulas territóriu Timor-Leste povu husu atu mantein pás no estabilidade seguransa hodi hakat ba eleisaun antesipada.

“Ha’u apela ba lideransa sira hotu atu konsidera povu nia direitu hodi buka mantein nafatin pás no estabilidade ba rai ida ne’e, atu garante seguransa di'ak para festa demokrasia ne’e bele la'o ho susesu”, tenik nia.

Alkatiri deklara, sente triste kuandu haree lideransa balun hahú hata'uk povu kbiit laek sira relasiona ho programa governu nian.

Tuir nia, lider rezisténsia mak kontinua halo ameasa ba povu mak sei lakon konfiansa husi povu. Tanba ne’e, mai hamutuk harii pás no estabilidade ba rai doben ne’e atu valoriza povu nia direitu nu'udar soberanu.

 Povu Tenke Kaer Metin Unidade Nasionál

Nune’e, Partidu Demokrátiku (PD) husu ba povu iha territóriu laran tomak atu ka’er metin nafatin unidade nasionál ne'ebé hatuur ona hodi konstrui Estadu direitu demokrátiku tuir prinsípiu erois sira nian.

Prezidente PD, Mariano ‘Assanami’ Sabino hatete, kuadru no militante PD nia orijen mai husi povu maubere terus na'in. Tanba ne’e, iha ukun aan ne’e hakarak kria kondisaun hotu-hotu atu povu maubere bele hakmatek hodi konstrui nia aan hodi hakat ba oin.

“Partidu Demokrátiku sei la husik se de’it mak hakarak atu hafahe povu ida ne’e, tempu to’o ona atu hapara odi malu, oho malu”, dehan nia.

Iha kampaña eleitorál ba eleisaun antesipada ne’e PD iha nia prinsípiu lakohi atu uza momentu ne’e hodi insulta no trata malu, maibé momentu ne’e hodi halo edukasaun sívika ba povu tomak atu bele hatene saida demokrasia.

Tanba ne’e, husu ba lider partidu hotu-hotu iha kampaña eleitorál ne’e hato’o de’it programa labele lori istória pasadu hodi insulta no trata malu hodi hasai liafuan provokativu ne’ebé iha tendénsia negativa ba estabilidade nasionál.

Assanami hatutan, pás no estabilidade nasionál la'ós mai husi Estadu, maibé ne’e mai husi ida-idak nia-aan rasik hodi kontribui atu hatudu kualidade estadu ida ne’e nian.

Tanba ne’e, husu ba povu tomak atu intera prosesu demokrasia ida ne’e hodi hadook aan husi violénsia oi-oin hodi kontribui ba dezenvolvimentu nasionál. 

Rate this item
(0 votes)

Independente Digital TV