Sekretáriu Jeral AMN-TL, Arlindo Freitas, sujere ba lider nasionál hotu-hotu, veteranus, partidu polítiku atu iha konsiensia nasionál ba funsionamentu sistema edukasaun iha Timor-Leste ho urjente no lais, tanba dadaun ne'e setór edukasaun grave no dezorganizadu iha ensinu aprendijazem.
“Ami AMN-TL dehan grave eskola barak iha territóriu nasionál menus profesores atu hanorin alunu sira, até eskola balun ameasadu atu taka efeitu husi ME desizaun hapara profesór voluntáriu, reklamante no voluntáriu,” dehan Sekretáriu Jeral AMN-TL liu husi konferensia imprensa iha Jardim 05 Maiu Kolmera, Tersa (30/01).
Sekretáriu afirma, AMN-TL dehan dezorganizadu tanba iha ME, dirijentes sira la iha koordenasaun di'ak ho superior sira , nune'e ida-ida halo ninia deklarasaun iha públiku ho variadus.
Antes ne'e Ministra Edukasaun Dulce de Jesus deklara iha média nasionál balun katak, la rekonhese signifika alias bandu eskola sira atu simu kualker profesór ne'ebé eziste iha eskola ne'ebé ho voluntariu, reklamente, kontratadu, exeptu profesor permanente.
Aliende ne'e mós Diretór Jeral nia deklarasaun ne'ebé hatoo iha loron 24 fuln Janeiru 2024, kontrariu ho deklarasaun Ministra nia ne'ebé dehan ME la iha sirkulár ida hodi hapara profesór sira iha eskola no husu profesór sira atu kontinu hanorin iha eskola.
Enkunatu, Serkretariu Estadu Ensinu Sekundariu Jeral, Ensinu Sekundariu Tekniku Vokasionál nia deklarasaun iha públiku katak sei taka fila-fali eskola balun neebé iha teritoriu nasional.
Husi deklarasaun hirak ne'e, AMN-TL konsidera kontrariu ho prioridade IX governu nian neebé deklara ona husi Primeiru Ministru katak sei espande eskola sira too iha área rurais durante mandate tinan lima oin mai.
“Ho deklarasaun iha laten, ami sente preukupa tebes, tanba iha instituisaun ida maibé deklarasaun variadus ne'ebé kria konfuzaun no agrava liu tan iha ME nia funsionamentu atuál, liliu iha funsionamentu ensinu aprendijazem,” Nia hakotu.
