Istoria husi Antonio Mendonça ho ninia familia ne’ebé Jornal INDEPENDENTE públika iha fulan Jullu 2023 kontinua hetan atensaun husi entidade sira.

Iha 8 Novembru, horseik, parte AMD no MSSI Dili hakat ba Antonio nia uma iha laletek ida iha Karau-mate hodi oferese tan apoiu.

Administrador Postu Administrativu Kristu Rei, Fernando Araujo, ne’ebé Prezidente AMD, hatete, apoiu ne'ebé munisipiu Dili fó atu ajuda Antonio ho nia familia hodi bele atende sira-nia nesesidade uma-laran.

"Apoiu sira ne'e atu ajuda imi-nia moris, ne'ebe iha ne'e kulsaun, balde, foos, lona, kadeira lima, buat barak iha ne'e atu fó ba ita-boot, ho ekipa tomak ne'ebé ohin mai halo asaun karidade," dehan Fernando hodi entrega apoiu ba Antonio ho nia familia, iha nia hela-fatin, Kuarta (08/11).

Nia dehan, dala-ruma parte postu administrativu atu halo pedidu apoiu ba Antonio nia familia, dala-ruma ema ladun fiar. Maibé, bainhira haree rasik, realidade sira hasoru duni difikuldade.

Ba Antonio nia uma, nia dehan, karik iha tinan oin governu kontinua implementa UNP, Antonio sei hetan prioridade tanba nia uma merese duni atu hadia.

“Loloos tinan ne'e Antonio hetan ona UNP maibé iha Aldeia Karau Mate rasik ema kbiit-laek ida mak hetan ona no kondisaun aat liu fali Antonio nian, nune'e Antonio hetan de'it kalen.”

"Ne'ebé karik tinan oin, ida ne'e sei sai prioridade, purke kriteria ida ne'ebé uza iha tinan kotuk ba ne'e tenke hadia tanba kriteria ne'e mak halo ita atu apoiu kbiit-laek sira ne'e susar tanba ema ho kondisaun uma hanesan barak loos," dehan nia.

Iha Fatin hanesan, diretora MSSI Dili, Judit dos Reis Sarmento reforsa, parte MSSI ho ekipa AMD apoiu tan nesesidade ba Antonio ho nia familia tanba sira merese duni atu hetan apoiu.

"Ami mai iha ne'e atu fó solidariedade ba maun Antonio ho mana, tanba ami hanoin katak labarik na’in lima ne'e mak futuru nasaun nian, mais nesesidade la responde ba sira, mais sira-nia fatin ne'e mak (tenke) dignu ba sira," dehan nia.

Nia dehan, aihan ne'ebé ekipa apoiu ba Antonio ho nia familia ne'e atu aguenta ba loron balun de'it, maibé MSSI nafatin hamriik hodi reforsa Antonio ho nia familia, karik sei iha tan apoiu balun ba sira.

Iha fatin hanesan, Antonio hato’o ninia agradesimentu ba apoiu hirak ne’ebé fó ba nia ho nia familia.