Tuir Diretór Jerál STAE, Acilino Manuel Branco hatete, sei realiza iha loron 13 fulan-Novembru tinan ne’e, tanba ne’e STAE distribui ona material sira ne’e ba munisipiu.

Nia dehan, material hirak ne’e atu kompleta deit material sira ne’ebé utiliza ona ba iha eleisaun orgaun suku nian iha loron 28 fulan-Outubru 2023.

“Ohin ita halo distribuisaun ba material sira, liliu material lojistika hodi halo kompleta deit matrial sira ne’ebé utiliza ona iha primeira volta ninia,”dehan nian iha Gráfika Nasionál Taibessi, Kinta (09/11).

Diretór ne'e afirma, bainhira bulletin votus ne’e to’o iha munisipiu, ekipa sira husi STAE no CNE  sei halo verifikasaun ba material hirak ne’e iha loron rua nia laran, hahú iha loron 10 to’o 11 fulan-Novembru tinan ne’e.

“Ohin halo ona distribuisaun ba material sira, tan ne’e iha loron aban ho bairua hahú halo verifikasaun nune’e bele deteta karik iha prosesu produsaun no preparasaun lojistiku sira iha munispiu mak buat balun menus iha tempu loron rua nia laran ne’e ita bele hadia, no ohin fó ona orientasaun ne’ebé klaru ba komando PNTL liu husi Komandu operasional atu halo atu seguransa ne’ebé másimu ba prosesu refere,” DJ esplika.

Iha fatin hanesan Diretór  Jeral Dezentralizasaun Lokal António Guterres hatete hatutan, eleisaun orgaun suku ba segundu volta ne’e sei realiza nafatin iha aldeia.

"Realizasaun eleisaun ba orgaun suku segundu volta, nia funsionalmentu Meza eleitoral iha Aldeia nafatin," nia hakotu.

Entretantu, tuir dadus total suku sira ne’ebé avansa ba eleisaun segunda volta iha teritoriu Timor-Leste hamutuk 271.