Referensia hatudu momos katak, iha tinan 2007, partidu boot (FRETILIN no CNRT) la manan maioria absoluta, CNRT tenki dada partidu kiik sira hodi ukun hamutuk. Akontese tan iha tinan 2012, CNRT tenki dada tan partidu kiik sira hodi halo koligasaun. Koligasaun moruk ida ne’ebé FRETILIN nuudar manan maioria simplis hasoru iha tinan 2017, partidu KHUNTO tenki sai husi koligasaun FRETILIN no Partidu Demokratiku no too ikus Governu monu.
Agora iha tinan 2020, CNRT tenki kaer metin partidu kiik sira hodi hetan maioria parlamentar forma Governu, hanesan KHUNTO, PD, no sira seluk la inklui FRETILIN no PLP.
Maibé CNRT nuudar partidu boot tenki asegura no hamaus partidu kiik sira, tanba ida sai maka koligasaun monu.
Tanba ne’e, eis Primeiru Ministru Alkatiri dehan, FRETILIN hanesan partidu úniku ida iha nasaun Timor-Leste nafatin prontu kompete ho partidu polítika sira seluk iha eleisaun antesipada ne'ebé atu akontese iha kualkér tempu.
Nune’e, bainhira realiza duni eleisaun antesipada maka estratéjia Partidu FRETILIN nian hakarak manan maioria absoluta mak forma inkluzaun.
"Manan maioria absoluta mesak depois mak halo inkluzaun, haree ba ohin loron, partidu boot ida la manan maioria absoluta, partidu ki'ik mak sai fali determinante”, tenik nia.
Nune’e, Konselleiru Másimu Partidu KHUNTO, José dos Santos ‘Naimori’ Bukar hateten, agora desizaun hotu-hotu iha Prezidente Repúblika nia-liman hodi fó solusaun ba impase polítiku rai-laran.
Kuandu Prezidente Repúblika deside forma governu mós sira prontu, nune’e deklara ba eleisaun antesipada mós sei preparadu nafatin.
“Ami ne’e prontu de'it bainhira mak atu ba eleisaun antesipada no KHUNTO prontu mós bainhira mak forma governu foun. Sempre prontu atu sai servidór. Prontu atu hamutuk ho lider atu halo buat foun ba povu no nasaun ida ne’e,” dehan nia, iha nia rezidénsia Maleunana, Dili, horisehik.
