Diretur Ezekutivu AJAR, José Luis Oliveira hateten, barlaki sai mos abut ba violensia hasoru feto, tanba ne’e komunidade balun komesa iha ona konsiensia rasik atu muda kultura barlaki ida ne’e.

“Bainhira ita ba hafolin feto ho folin makas ka karun, ita konsidera feto hanesan ita nia animal, nune’e ita baku, tebe no tuku konforme ita nia hakarak, entaun ida ne’e maka sai hanesan fator ida hodi haburas violensia kontrola feto,” informa José Luis Oliveira bainhira partisipa komemorasaun loron internasional feto iha salaun, João Paulo II Komoro, foin lalais.

Nia dehan, asaun sira ne’e hatudu momoos, mane ne’ebé fó ona barlake ba feto, sira trata feto la ho dignidade, maske Konstituisaun preve katak, estadu rekoñese uza kostume normas kultura sira.

“ Agora dadaun ita hare sira ne’e kontra lei, liu-liu kontra artigu 16 no 17 iha Konstituisaun RDTL, entaun kultura barlake halo diskriminasaun no barlake ne’e sai hanesan pratika ida ne’ebé maka hanesan haburas violensia ba fali feto,” tenik nia.

Nia esklarese, kultura barlakiadu kontraditoriu tebes ho espiritu Konstituisaun ne’ebé maka konsidera ema hotu iha dignidade, maibé ema halo buat ruma la loos no la tuir hakarak, sira ho vontade baku tuir sira nia hakarak.

Iha fatin hanesan, Diretur Jeral SEII, Armando da Costa hateten, hare husi perspetiva kultura nian, iha  sosiedade eziste  pratika kultura barlaki, tanba ne’e ema ida labele hanoin atu halakon ida ne’e.

“Ida ne’e parte ida husi ita nia sosiedade, importante maka ita presiza estuda barak, peskiza barak atu bele hare saida maka parte pozitivu husi pratika ida ne’e, atu ita bele kolabora no halo mudansa balun ne’ebé karik ladun fó vantajen di’ak,,” hakotu nia.