“Tuir dadus husi Institutu Nasionál Farmasia no Produtu Médiku ai-moruk ne’ebé stock out iha 34%, no hela 66% mak iha ne’e husi item 10, total item ne’ebé ita presiza hamutuk 1.364, no iha deit 907, item 457 mak la iha armejen,”dehan nia ba Online INDEPENDENTE iha knar fatin INFPM Kampu-Alor, Tersa (07/11).

Tuir Ezekutivu ne’e, ai-moruk ne’ebé menus, la sufisiente atu halo atendementu ba pasiente sira, maibé Governu nafatin esforsu atu responde ba nesesidade pasiente sira nian.

“Tuir estandar ne’e la sufisente ida maibé ne’e ita nia situasaun real mak agora hanesan ne’e, ne’ebé governu halo esforsu tomak atu bele responde, atu halo oinsa hodi bele taka item 34% ne’ebé mak la iha,” katak Diretór.

Maske ho ai-moruk ne’ebé stock out hela, maibé Diretor INFPM hatete, prosesu distribuisaun ai-moruk ba munisipiu no hospital referál sira kontinua la’o.

Entretantu, Diretór ne’e hatutan, dadaun ne’e, Timor-Leste iha armajen rejionál tolu hanesan iha Maliana, Ainaro no Baukau.

Tan ne’e ai-moruk ne’ebé atu distribui ba munisipiu sira tuir nesesidade ne’ebé prezisa.

Entretantu, molok ne'e, Diretór Ezekutivu Klinika Bairo-Pite, Inacio do Santos informa, durante fulan haat ona stock aimoruk ba hipertensaun iha klinika Bairu-pite laiha.

Ho kondisaun ne’e, nia dehan, pesoal saude sira iha klinika refere pasa reseita ba pasiente sira hodi ba sosa aimoruk iha farmasia sira iha kapital Dili.

"Durante fulan haat ona ita-nia aimoruk ba hipertenseun nian stock laiha. Oinsa ita responde ba pasiente sira? Bainhira ita-nia pasiente sira mai ita-nia pesoal saúde sira fó reseita depois sira ba sosa de'it iha klínika privadu ka farmasia sira," dehan nia iha nia knar-fatin, Segunda (06/11).