Vise Ministru Comersiu no Industria, Augusto Junior Trindade, hatan preokupasaun sira husi bankada opozisaun kona-ba implementasaun subsídiu intervensaun temporária ba estabilizasaun presu foos iha merkadu,segunda (06/11).

 

Ministru Comérsiu no Indústria Nino Pereira no Vise-Ministru Komérsiu Augusto Junior Trindade marka prezensa iha plenaria Parlamentu Nasionál, segunda ne'e.

 

Ministru esklarese, Governu hamosu ona polítika intervensaun temporária ba presu foos iha merkadu, liuhosi subsidia empreza importadór sira no identifika empreza importadór foos lima mak sai benefisiáriu ba subsídiu hodi reduz presu foos bainhira faan husi sira nian armajen, no kompra foos 30.000 toneladas ba CLN hodi antesipa situasaun urjente ruma iha futuru.

 

Foos 25kg de parcela sei hetan subsídiu 5 USD no sei faan iha retallu ka keoske sira ho presu másimu 12.50 USD, tuir Dekretu-Lei nu. 76/2023.

 

Empreza importador rua mak hahu faan ona foos 20kg ho presu 9 USD sai husi sira-nia armajen. Foos sira ne'e hanesan Amor de Família husi Perisos no Beruang Merah husi Kreatif Furak.

 

Foos ho marka refere hahu faan mós iha loja no keoske sira ho presu 10 USD to'o 12.50 USD iha Munisipiu sira.

 

Rekoñese mós katak medida ida ne'e temporáriu de'it, nu'udar medida responsiva imediata ne'ebé Governu foti hasoru situasaun urjente tuir preokupasaun públiku nian (Konsumidór).

 

Atu asigura katak Timor-Leste iha seguransa alimentár ne'ebé di'ak presiza investimentu maka'as iha seitor agrikultura. Presiza fasilidade, infraestrutura no rekursu umanu ne'ebé adekuadu, nune'e bele hetan produsaun aihan ne'ebé boot.

 

Timor-Leste atualmente depende maka'as ba foos importadu tanba produsaun iha rai laran menus. Tuir previzaun, iha tinan ida ne'e akontese alterasaun klimátika ne'ebé extrime no lori efeitu ba produsaun aihan iha rai laran.

 

Governu sei buka meius hodi liuliu kontinua aproximasaun Governu ba Governu hodi importa foos mai Timor-Leste, nune'e asigura estoke foos iha Timor-Leste hodi la monu ba krize alimentár.