Portavoz ADTL Jacinta Ana Paula, hatete, Governu dasia liu husi Ministeriu Solidariedade Sosial no inkluzaun (MSSI) atu aloka rekursu hodi fó atensaun ba asuntu defisiénsia iha Timor-Leste.
Nune’e mós, husu ba Ministeriu hotu hola parte no aloka rekursu ba implementasaun Planu Asaun Nasional defisiénsia nian ba tinan 2021-2030.
Ba Ministeriu Obras Públika atu garante konstrusaun foun tenki asegura asesibilidade bae ma ho defisiénsia fiziku sira.
Portavos ne’e mós, husu ba Parlamentu Nasionál atu kontinua monotoriza no finaliza atividade Governu nian ne'ebé iha relasaun ho asuntu defisiénsia liliu implementasaun PAN Difisiensia no konvensaun ONU ba direitu EhD.
“Asosiasaun Defisiénsia Timor-Leste husu ba entidades hotu atu proteje no promove ema ho defisiénsia iha sosiedade ba aspetu hotu iha dezenvolvimentu nasional”, dehan nia liu husi Konferensia Imprensa, iha Salaun ADTL Maskarenhas, Balide, tersa (04/07).
Nia dehan, ema ho defisiénsia tenki nesesita oportunidade hodi hola parte no partisipa iha área oioin ba dezenvolvimentu la’ós nesesita de'it karidade.
"Ami nafatin husu ba ita hotu atu sai protetor no promotor ba ema ho defisiénsia iha ita nia sosiedade tanba ema ho Difisiensia barak mak sei moris iha kondisaun vulneravel nia laran," dehan nia.
Entretantu, Diretór Ezekutivu ADTL Cesário da Silva haktuir, tuir dadus estatistika uma-kain tinan 2022, ema ho defisiénsia ho kondisaun vulneravel liu, ne’ebé hela deit iha uma no laiha oportunidade atu la’o sai, dala barak sira toba deit, ne’ebé iha teritoriu laran tomak hamutuk rihun 17. Husi total dadus rejistadu iha tinan 2022 hamutuk 93.371.
