Tanba ne’e, Governu aprova loron haat (4) fulan-Jullu mak sai hanesan loron komemorativu ba EhD iha Timor-Leste, tanba ne'e EhD selebra loron refere ho Topiku "Ita mak protetor no promotor ba komunidade defisiénsia iha Timor-Leste".

Diretór Ezekutivu ADTL Cesário da Silva hatete, loron nasional defisiénsia nia natureza komemorativu tanba ne'e ejiji ba Governu no entidades hotu-hotu atu konsidera loron refere hanesan loron nasional.

Nia dehan, diskusaun ne'ebé sira halo iha 28 Dezembru 2022 sira deside loron 4 fulan-Jullu, no sira husu atu loron ne'e ho natureza komemorativu de'it laos loron feriadu nasional, hodi nune'e ema nafatin servisu.

"Ita sei selebra tinan dahuluk ba ema ho defisiénsia, no ohin ita deklara sai públiku atu ema hotu konsidera loron ne'e definitivu ona, sai ona loron nasional defisiénsia", dehan Diretór iha Resinto ADTL Maskarinhas, tersa (04/07).

Iha fatin hanesan, Portavoz Jacinta Ana Paula Freitas liu husi konferensia imprensa husu ba entidades hotu atu valoriza loron importante ne'ebé aprova ona husi Governu hanesan loron Nasional ba EhD.

Nune'e mos, proteje no promove ema ho defisiénsia iha sosiedade ba aspetu hotu iha dezenvolvimentu nasional.

Nia dehan, ema ho defisiénsia tenki nesesita oportunidade hodi hola parte no partisipa iha área oioin ba dezenvolvimentu la’ós nesesita de'it karidade.

"Ami nafatin husu ba ita hotu atu sai protetor no promotor ba ema ho difisiensia iha ita nia sosiedade tanba ema ho difisiensia barak mak sei moris iha kondisaun vulneravel nia laran," dehan nia.

Enkuantu, tuir dadus estatistika uma-kain tinan 2022, ema ho defisiénsia ho kondisaun vulneravel liu, ne’ebé hela deit iha uma no laiha oportunidade atu la’o sai, dala barak sira toba deit, ne’ebé iha teritoriu laran tomak hamutuk rihun 17. Husi total dadus rejistadu iha tinan 2022 hamutuk 93.371.