Loron Tolu, Uma 274 Hetan Estragus Husi Dezastre Naturais   Featured

By Ivonia Varela Jullu 05, 2023 401
Komunidade nia uma ne'ebe hetan estragus husi dezastre naturais, iha Suku Lour Bobonaro. Foto:Media Sosial. Komunidade nia uma ne'ebe hetan estragus husi dezastre naturais, iha Suku Lour Bobonaro. Foto:Media Sosial.

DILI: Udan boot ne’ebé akontese durante loron tolu nia laran, hahú husi 02 to’o 04 fulan-Jullu tinan 2023, rezulta komunidade nia uma hamutuk 274 mak hetan estragus.

Diretór Relasaun Externa no Komunikasaun iha Autoridade Protesaun Sivil, Anacleto Caetano hatete, munisipiu ne'ebé afetadu ba dezastre naturais mak haesan, Baukau, Vikeke, Kovalima, Manatuto, Lautem, Bobonaro, Ainaro no Manufahi.

“Udan ne'ebé akontese durante loron tolu ho velosidade ne'ebé maka’as, tanba ne'e estragus komunidade nia uma, toos no natar inklui infrastrutura balun”,dehan nia iha Salaun APC, Kaikoli, kuarta (05/07).

Nia esplika, inundasaun ne'ebé akontese iha Munisipiu Ainaro, Postu Administrativu Hatu-Udo, Suku Foho-Ailiko afeita ba komunidade nia uma sanolu (10) no estragus irigasaun inkliu natar hektares haat (4) no kolam ikan ida.

Nune'e mos, iha Postu Administrativu Ainaro, Suku Manutasi, Aldeia Hatumetaudu, akontese rai-halai afeita komunidade nia uma hitu  (7) no vítima sira evakua ba hela iha família no viziñu sira uma.

Iha Munisipiu Manufahi, akontese udan boot durante oras tolu nia laran, halo mota boot hodi afeita ka rezulta ponte avatu lokaliza iha Postu Same, Suku Letefoho ne'ebé ligasaun entre diresaun Same-Dili estragus total ka kotu.

Ba iha Postu Alas, Suku Dotik akontese inundasaun afeita ba uma kain rua no Suku Umaberloik afeita ba komunidade nia uma 13 no vítima refere evakua hotu ba sede suku.

Enkuantu,  Munisipiu Kovalima, akontese udan boot rezulta ponte raiketan Suai kotu, ponte ne'e lokaliza iha Postu Administrativu Maukatar ne'ebé  liga ba Suai Vila no Zumalai.

Ne’ebé akontese mós rai halai iha posto refere, hodi afeita ba komunidade nia uma tolu (3) no uma lisan rua (2) hetan estragus.

Inundasaun ne'ebé akontese iha Postu Suai Villa, Suku Beco, Aldeia Maukola, afeita ba komunidade nia uma 102, Aldeia Bibiatan afeita ba uma kain 57 no Aldeia Aidantuik afeita uma kain 24. Posto Tilimor Suku Lalawak Aldeia Aioan afeita ba uma kain ualu.

Tanba ne'e, total familia afetadu iha Munisipiu Kovalima hamutuk 188.

Enkuantu, iha Munisipiu Manatuto Posto Laklubar akontese rai-halai hodi afeita ba komunidade nia uma rua (2) no iha Postu Natarbora Suku Sikone akontese inundasaun estragus komunidade nia plantasau sira iha toos.

Entretantu, iha Munisipiu Ermera akontese rai-halai estragus komunidade nia uma tolu (3) no ai-monu hanehan komunidade nia uma ida.

Iha Munisipiu Baukau, Postu Administrativu Kelikai rai halai estragus uma rua (2).

Iha Munisipiu Bobonaru, Suku Lour, Aldeia Olo-Olo rai-halai afeita ba komunidade nia uma hamutuk 47.

Enkuantu, Munisipiu Vikek, Postu Administrativu Lakluta  akontese udan boot hamosu inundasaun estragus  ponte sumato diresaun Lakluta ba Vikeke-Vila.

Iha Munisipiu, Lautem akontese udan ho intensidade maka'as halo mota Suru-Uaku lori estudante na’in haat kompostu husi feto na’in tolu no mane ida.

"Estudante feto nain 3 konsege salva aan no estudante mane mak mota lori ho naran Joanico da Costa (Lakon), idade 17 anos, dadaun ne'e ekipa APC Munisipiu Lautem, CVTL, hamutuk ho komunidade sei buka tuir vítima ne'ebé lakon, bainhira estudante nain hat ne'e fila husi eskola EBC Odofuro ba fali uma iha Lereadu hakur mota mak mota lori iha oras 17:00," dehan nia.

Nia dehan, akontese udan boot durante 24 oras iha Munisipiu Lautem rezulta mós estrada Postu Tutuala ameasa kotu, no ponte berekoco liga estrada nasional Lautem no liga ba kapital Dili ameasa kotu.

Nia afirma, vítima ne'ebé afeita ba dezastre naturais ekipa Autoriedade Protesaun Sivil (APS) fó ona apoiu emerjensia hanesan food Item no laos Food Item. Ba apoiu rekoperasaun ekipa sei halo fila-fali reverifikasaun.

Rate this item
(0 votes)

Independente Digital TV