Vise Primeiru Ministru no Ministru Turizmu Ambiente no mós Ministru Asuntus Ekonomikus no Dezenvolvimentu, Francisco Kalbuadi Lay, hato'o nia diskursu iha ambitu serimonia despedida no handover MTCI, Iha CCD, Kaikoli (03/07). Foto:INDEPENDENTE.
Nia dehan, dezenvolve ekonomia rai mak hahú husi dezenvolvimentu ekonomia, ekonomia rai atan hesan mikro no makro nian.
“Timor-Leste lakleur tan tama ona ba ASEAN, ami simu ona knar foun no ami sei halo tuir servisu ne’ebé durante ne’e lao ona no buat ne’ebé diak ami sei kontinua no ida ne’ebé falta ami sei kompleta”, dehan Vise Primeiru Ministru, iha serimonia despedida no handover MTCI, Iha CCD, Kaikoli (03/07).
Nia dehan, servisu ne’e sei la mesak, maibé servisu hamutuk ho Ministeriu Turizmu Komersiu no Industria (MTKI) no grupu sira.
“Ami sei halo servisu tuir komprimisio ne’ebé ami hato’o ona iha eleisaun parlamentar, klaru ke iha prioridade hirak mak iha ne’ebé ida mak dezenvolvimentu ekonamia, ekonomia rai atan, hanesan mikro ho makro nian, maibé ha’u la mesak hamutuk ho Ministru no Vise-Ministru MTCI iha ne’e ho grupo lubuk ida ne’ebe servisu hamutuk ho ha’u,” nia esplika.
Governante ne’e husu, ba se de’it mak atu servisu iha Ministeriu refere sei lahare ba oras maibé tuir deit lei ne’ebé iha ona.
“Ha’u servisu sei lahare ba oras, se mak hakarak servisu ho ha’u atu pronto ka lae nafatin servisu, se laprontu mós la iha buat ida, maibe ha’u mai atu servi rai no povu ida ne’e”,nia haktuir.
Entretantu, Ministru Sesante José Lucas da Silva do Carmo, apela ba funsionáriu hotu atu koopera no kontinua halo servisu di’ak ho Ministru foun sira. “Tanba ita hotu nia mehi mak liberta povu husi mukit, ita-nia objetivu ida de’it ba bein estar komun”, dehan Ministru sesante.
“Ha’u hakarak hateten katak dezenvolvimentu laos estatika. Ita ema troka malu, balun sai balun tama ho esperiensia diferente no tau hamutuk mak ita forti liutan hodi bele alkansa ita-nia mehi ne’ebé ita-nia erois no martires da pátria husik hela mai ita, atu kontinua. Susesu ba IX Governu no susesu ba ita-boot sira hotu”.
Nune'e, hamutuk bele lori nasaun Timor-Leste ida buras liu no Timor-Leste ba Timoroan hotu no ba povu tomak.
