Liu husi konferensia ba imprensa, kuarta ohin, Vise Primeiru Ministru no Ministra Solidariedade Sosial no Inkluzaun (MSSI), Armanda Berta Dos Santos anunsia loron simu subsidiu ne’e, relasiona ho situasaun surtu Covid-19, ne’ebé Timor-Leste infrenta.
Vise-PM hatete, apoiu monetáriu ne’e sei benefisia uma kain hamutuk 298.119 iha Munisipiu 12, la inklui REAOA-Oekusse.
Orsamentu ne’ebé atu transfere total hamutuk $99,623,800.00, ne’ebé koresponde ba pagamentu apoiu monetáriu uma kain ba fulan rua hamutuk $200.
Objetivu husi apoiu monetáriu ne’e, Presidente partidu KHUNTO ne’e dehan, hodi garante sustenta família sira no apoiu lacuna despezas tanba situasaun Covid-19.
Husu ba uma kain sira atu kolabora ho ekipa pagamentu too fatin pagamentu iha aldeia no suku sira.
Aliende ne’e, husu mós ba entidade hotu atu kolabora kria pas, estabilidade no kumpri rekijitus ho lei sira iha prosesu pagamentu.
Liliu ba autoridade local sira atu marka prezensa iha fatin pagamentu tuir orariu, no tuir orientasaun Ministériu Saúde no Organizasaun Saúde Mundial hodi kontinua kumpri regra distansia sosial.
