29 Agosto: SIJK Rejista Tan Sidadaun Na’in 3 Mate ho Covid-19, Kazu Foun iha Na’in 166

By Agostu 29, 2021 611
Koveiru sira ne'ebe prepara atu hiit ema mate ho Covid-19, iha Sala Izolamentu Lahane. Foto:Dok/Independente. Koveiru sira ne'ebe prepara atu hiit ema mate ho Covid-19, iha Sala Izolamentu Lahane. Foto:Dok/Independente.

DILI: Sala Situasaun sentru Integradu Jestaun Krize (SIJK) ohin (29/08) relata, ekipa konjunta saúde rejista tan sidadaun Timor-Oan na’in 3 (tolu) mate ho Covid-19 iha Sala Izolamentu Vera Crus, Lahane ho Maliana. Nune’e, kazu foun hamutuk 166.

Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, matebian na’in tolu ho identidade mane hotu no iha idade tinan minimu 70 no maximu tinan 89.

Enkuantu, matebian na’in tolu ne’e, iha na’in rua seidauk vasina no ida seluk hetan ona vasina doze dahuluk.

“Matebian mane dahuluk ho idade tinan 70, hela iha Dili no hetan ona vasina doze dahuluk. Nune’e, iha loron 20 fulan-Agostus tinan 2021 matebian hetan diagnistikadu iha emerjensia Óspital Nasional Guido Valadares (HNGV) ho Sindroma Insufisiénsia Respiratoria Aguda (SIRA), tanba Covid-19. Iha loron ne’e kedas matebian halo tratamentu iha Sala Izolamentu Lahane tuir protokolu ne’ebé iha. Enkuantu,   matebian hakotu iis iha horkalan (28/08), oras tuku 20:20, tanba respiratoric failure/parajen respiratoria,”dehan nia iha komunikadu, ne’ebé Online INDEPENDENTE asesu domingo ne’e.

Aleinde, matebian mane daruak ho idade tinan 89, hela iha Dili no matebian seidauk hetan vasina. Nune’e, iha loron 22 fulan-Agostus tinan 2021 hetan diagnóstikadu iha HNGV ho Sindroma Insufisiénsia Respiratória Aguda (SIRA), tanba Covid-19. Iha loron ne’e kedas matebian hala’o tratamentu iha Sala Izolamentu Vera Crus tuir prokolu ne’ebé iha. Enkuantu, Matebian hakotu iis iha horikalan (28/08) iha oras tuku 22:30, tanba respitatoric failure/parajen respiratoria.

Entretantu, matebian mane datoluk, ho idade tinan 72, hela iha malian no seidsauk simu vasina. Nune’e iha loron 27 fulan-Agostus tinan 2021 hetan diagnóstikadu iha Maliana ho Sindroma Insufisiénsia Respiratória Aguda (SIRA), tanba Covid-19. Enkuantu, matebian sofre mós moras kankru próstata ho metastaze ba orgaun seluk iha isin. Iha loron ne’e kedas matebian hala’o tratamentu iha Sala Izolamentu Maliana. Nune’e horkalan (28/08) iha oras tuku 19:00 matebian hakotu iis tanba multiple organ failure/falensia orgaun barak.

 Tanba ne’e, familia husi matebian na’in tolu kordena ona ho ekipa saúde atu hala’o funeral tuir protokolu ne’ebé adopta iha Timor-Leste.

Ho nune’e, kazu foun ne’ebé relata ohin, iha Kapital Dili na’in 119, Baucau 8, Covalima 2, Vikeke 17,  Bobonaro 1, Aileu 13, Manatuto 1 no Ermera 5.

Husi kazu detetadu foun ohin, iha kazu 65 ka 39,1% mak hatudu sintomas. Husi kazu 49(30%) iha ona vasina kompletu no 26 (11%) hetan ona vasina doze dahuluk.

Aleinde, SIJK mós rejista pasiente ne’ebé rekupera husi Covid-19 hamutuk na’in 132 no kazu ativu iha Sala Izolamentu ho total hamutuk 4.554.

Totál Komulativu kazu konfirmadu sura husi loron 21 fulan-Marsu tinan 2020 to’o loron 29 fulan-Agostus tinan 2021 hamutuk 16.402.

Enkuantu, total kazu mate ho Covid-19 iha Timor-Leste hamutuk 62.

Husi horiseik (28/08) mai ohin teste PCR ne'ebé Laboratóriu Nasionál Saúde halo hamutuk 335 ne’ebé kompostu husi, Vijilánsia sentinela na’in 9, Contact tracing 179, Random Screening 30, Viájen sai husi serka sanitária husi Dili 94, Viájen internasionál laiha no Follow up iha kuarentena 23. Nune’e, total PCR ne’ebé halo iha Munisipiu sira seluk, RAEOA no HNGV hamutuk 235.

Ohin, iha Izolamentu Vera Crus no Lahane, HNGV no mós fatin seluk iha teritoriu laran tomak, halo tratamentu ba kazu detetadu hamutuk 121, husi numeru ne’e, iha grave na’in 24.

Husi sira na’in 24 ne’ebé grave, iha na’in 2 uza ventilador, na’in 3 uza CPAP-Continous Positive Airway Pressure no na’in 19 uza oksijéniu.

Nune’e, iha moderado na’in 66 no leve na’in 31.

Tanba ne’e, SIJK  husu ba sidadaun hotu atu kumpri regras hanesan fase liman bebeik, uza maskara, labele halibur malu liu na’in sanulu ba leten, atu nune’e prevene moras Covid-19 ho variante foun ho naran Delta.

 

Asistente Editor: Saturnina da Costa

Rate this item
(0 votes)
Last modified on Tersa, 31 Agostu 2021 11:50
Saturnina da Costa

Jornalista Jornal Independente

https://independente.tl

Independente Digital TV