Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, matebian ne’e ho idade 76 hela iha Kapital Dili, sidadaun refere seidauk simu vasina.
“Iha loron 28 fulan-Agostus tinan 2021 matebian hetan diagnistikadu iha emerjensia Óspital Nasional Guido Valadares (HNGV) ho Sindroma Insufisiénsia Respiratoria Aguda (SIRA), nune’e matebian hakotu iis iha oras tuku 03:03 madrugada, tanba respiratoric failure/parajen respiratoria. Rezultadu PCR hafoin iis kotu CT: 22,8,”dehan nia iha komunikadu, ne’ebé Online INDEPENDENTE asesu sabado ne’e.
Tanba ne’e, familia rejeita atu hala’o funeral tuir protokolu ne’ebé adopta iha Timor-Leste.
Entretantu, kazu foun ne’ebé relata ohin, iha Kapital Dili na’in 197, Baucau 30, Covalima 10, Vikeke 5, Ainaro 6, Bobonaro 5, Lautem 3, Likisa 4, Aileu 2, RAEOA 6 no Manufahi 8.
Husi kazu detetadu foun ohin, iha kazu 102 (37%) iha ona vasina kompletu no 49 (11%) hetan ona vasina doze dahuluk.
Aleinde, SIJK mós rejista pasiente ne’ebé rekupera husi Covid-19 hamutuk na’in 125 no kazu ativu iha Sala Izolamentu ho total hamutuk 4.523.
Totál Komulativu kazu konfirmadu sura husi loron 21 fulan-Marsu tinan 2020 to’o loron 28 fulan-Agostus tinan 2021 hamutuk 16.236.
Enkuantu, total kazu mate ho Covid-19 iha Timor-Leste hamutuk 59.
Husi horiseik (27/08) mai ohin teste PCR ne'ebé Laboratóriu Nasionál Saúde halo hamutuk 655 ne’ebé kompostu husi, Vijilánsia sentinela na’in 82, Contact tracing 308, Random Screening 145, Viájen sai husi serka sanitária husi Dili 94, Viájen internasionál 1 no Follow up iha kuarentena 25. Nune’e, total PCR ne’eb’e halo iha Munisipiu sira seluk, RAEOA no HNGV hamutuk 367.
Ohin, iha Izolamentu Vera Crus no Lahane no mós fatin seluk iha teritoriu laran tomak, halo tratamentu ba kazu detetadu hamutuk 118, husi numeru ne’e, iha grave na’in 23.
Husi sira na’in 23 ne’ebé grave, iha na’in 3 uza ventilador, na’in 3 uza CPAP-Continous Positive Airway Pressure no na’in 17 uza oksijéniu.
Nune’e, iha moderado na’in 60 no leve na’in 35.
Tanba ne’e, SIJK husu ba sidadaun hotu atu kumpri regras hanesan fase liman bebeik, uza maskara, labele halibur malu liu na’in sanulu ba leten, atu nune’e prevene moras Covid-19 ho variante foun ho naran Delta.
Asistente Editor; Saturnina da Costa
