30 Agosto: Positivu Covid-19 iha Dili Tun ba 66, Mate Na’in 2

By Agostu 30, 2021 525
Teste PCR, rezultadu hatudu positivu Covid-19. Foto:Independente. Teste PCR, rezultadu hatudu positivu Covid-19. Foto:Independente.

DILI: Sala Situasaun Sentru Integradu Jestaun Krize (SIJK) ohin (30/08) relata, númeru kazu foun iha Munisipiu Dili tun ba 66 kompara ho loron horseik (29/08) iha na’in 119.

Enkuantu, ohin ekipa konjunta saúde rejita mós sidadaun Timor-Oan feto na’in rua mate ho Covid-19 iha Sala Izolamentu Vera Crus no Lahane. Nune’e, total kazu foun hamutuk 113.

Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, matebian na’in rua ho identidade feto hotu no iha idade tinan minimu 73 no maximu tinan 83.

Entretantu, matebian na’in rua ne’e, na’in ida seidauk simu vasina no ida seluk hetan ona vasina doze dahuluk.

“Matebian feto dahuluk ho idade tinan 73, hela iha Munisipiu Ainaro no seidauk  simu vasina. Nune’e, iha loron 27 fulan-Agostus tinan 2021 matebian hetan diagnistikadu iha Munisipiu Ainaro ho Sindroma Insufisiénsia Respiratoria Aguda (SIRA), tanba Covid-19. Iha loron ne’e kedas matebian halo tratamentu iha Sala Izolamentu Lahane tuir protokolu ne’ebé iha. Enkuantu, matebian hakotu iis ohin madrugda iha oras tuku 01:44, tanba respiratoric failure/parajen respiratoria,”dehan nia iha komunikadu, ne’ebé Online INDEPENDENTE asesu segunda ne’e.

Aleinde, matebian feto daruak ho idade tinan 83, hela iha Dili no matebian hetan ona vasina doze dahuluk. Nune’e, iha loron 22 fulan-Agostus tinan 2021 hetan diagnóstikadu iha HNGV ho Sindroma Insufisiénsia Respiratória Aguda (SIRA), tanba Covid-19. Iha loron ne’e kedas matebian hala’o tratamentu iha Sala Izolamentu Vera Crus tuir prokolu ne’ebé iha. Enkuantu, Matebian hakotu iis, ohin dader iha oras tuku 10:55, tanba respitatoric failure/parajen respiratoria.

Tanba ne’e, familia husi matebian na’in rua kordena ona ho ekipa saúde atu hala’o funeral tuir protokolu ne’ebé adopta iha Timor-Leste.

Ho nune’e, kazu foun ne’ebé relata ohin, iha Baucau kazu 32,  RAEOA 5, Covalima 2, Ainaro 2,   Bobonaro 5, no Ermera 1.

Husi kazu detetadu foun ohin, iha kazu 61 ka 54% mak hatudu sintomas. Iha kazu 17 (15%) iha ona vasina kompletu no 13 (12%) hetan ona vasina doze dahuluk.

Aleinde, SIJK mós rejista pasiente ne’ebé rekupera husi Covid-19 hamutuk na’in 91 no kazu ativu iha Sala Izolamentu ho total hamutuk 4.574.

Totál Komulativu kazu konfirmadu sura husi loron 21 fulan-Marsu tinan 2020 to’o loron 30 fulan-Agostus tinan 2021 hamutuk 16.515.

Enkuantu, total kazu mate ho Covid-19 iha Timor-Leste hamutuk 64.

Husi horiseik (29/08) mai ohin teste PCR ne'ebé Laboratóriu Nasionál Saúde halo hamutuk 520 ne’ebé kompostu husi, Vijilánsia sentinela na’in 105, Contact tracing 76, Random Screening 69, Viájen sai husi serka sanitária husi Dili 59, Viájen internasionál 24 no Follow up iha kuarentena 187. Nune’e, total PCR ne’ebé halo iha Munisipiu sira seluk, RAEOA no HNGV hamutuk 125.

Ohin, iha Izolamentu Vera Crus no Lahane, HNGV no mós fatin seluk iha teritoriu laran tomak, halo tratamentu ba kazu detetadu hamutuk 118, husi numeru ne’e, iha grave na’in 27.

Husi sira na’in 27 ne’ebé grave, iha na’in 2 uza ventilador, na’in 3 uza CPAP-Continous Positive Airway Pressure no na’in 22 uza oksijéniu.

Nune’e, iha moderado na’in 65 no leve na’in 26.

Tanba ne’e, SIJK  husu ba sidadaun hotu atu kumpri regras hanesan fase liman bebeik, uza maskara, labele halibur malu liu na’in sanulu ba leten, atu nune’e prevene moras Covid-19 ho variante foun ho naran Delta.

 

Asistente Editor: Saturnina da Costa

Rate this item
(0 votes)
Last modified on Tersa, 31 Agostu 2021 11:49
Saturnina da Costa

Jornalista Jornal Independente

https://independente.tl

Independente Digital TV