23 Setembru: Positivu Foun iha 58, Mate Ida Featured

By Setembru 23, 2021 399
Rezultadu hatudu positivu Covid-19. Foto: Dok. Rezultadu hatudu positivu Covid-19. Foto: Dok.

DILI: Sala Situasaun Sentru Integradu ba Jestaun Krize (SIJK) ohin (23/09) relata, ekipa konjunta rejista tan kazu positivu foun Covid-19 hamutuk na’in 58 no ema ne’ebé mate iha na’in ida.

Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araujo informa, iha Munisipiu Dili kontinua rejista númeru kazu boot liu kompara ho Munisipiu sira seluk.

Enkuantu, total kazu detetadu foun 58 ne’e, iha Dili deteta kazu 25, Baukau iha kazu 18, Ainaro iha kazu 1, Bobonaro deteta kazu 8, Kovalima deteta kazu 1, Manatuto iha kazu 2, Manufahi iha kazu 1 no Vikeke iha kazu 2.

“Husi kazu detetadu ne’e, na’in 26 ka 49% hatudu sintomas, na’in 17 ka 29% simu ona vasina kompletu no na’in 8 ka 14% simu ona vasina doze dahuluk,”dehan nia iha komunikadu ne’ebé Online INDEPENDENTE asesu kinta ne’e.

Maske deteta kazu pozitivu, maibé SIJK mós rejista kazu rekuperadu ne’ebé barak liu kazu pozitivu foun. Iha 23 Setembru ema na’in 148 mak rekupera no kazu ativu iha na’in 1.183.

Ba kazu mate, Rui informa, sidadaun Timor-Oan mane ho idade 54, hela iha Munisipiu Vikeke no seidauk simu vasina, diagnostikadu Sindroma Insufisiensia Respiratoria Aguda (SIRA) tanba Covid-19 iha Munisipiu refere.

Iha loron ne’e kedas pasiente hala’o tratamentu iha Izolamentu Lahane, nune’e ohin (23/09) dader tuku 10.30 pasiente hakotu-iis.

“Familia kolabora ho ekipa saúde atu hala’o funeral tuir protokolu ne’ebé adota iha Timor-Leste,” dehan Rui.

Rate this item
(1 Vote)
Saturnina da Costa

Jornalista Jornal Independente

https://independente.tl

Independente Digital TV