Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araujo informa, iha Munisipiu Dili kontinua rejista númeru kazu boot liu kompara ho Munisipiu sira seluk.

Enkuantu, total kazu detetadu foun ohin iha na’in 81, husi numeru ne’e, iha Dili deteta kazu 46, Baukau kazu 24, Bobonaro deteta kazu 1, Lautem deteta kazu 5 no Vikeke kazu 5.

“Husi kazu detetadu ne’e, na’in 23 ka 28,3% hatudu sintomas, na’in 10 ka 12% simu ona vasina kompletu no na’in 14 ka 17% simu ona vasina doze dahuluk,”dehan nia iha komunikadu ne’ebé Online INDEPENDENTE asesu kuarta ne’e.

Maske deteta kazu pozitivu, maibé SIJK mós rejista kazu rekuperadu ne’ebé barak liu kazu pozitivu foun. Iha 22 Setembru ema na’in 125 mak rekupera no kazu ativu iha na’in 1.274.

Ba kazu mate, Rui informa, sidadaun Timor-Oan mane ho idade 85, hela iha Munisipiu Vikeke no seidauk simu vasina, diagnostikadu Sindroma Insufisiensia Respiratoria Aguda (SIRA) tanba Covid-19 iha Munisipiu refere.

Pasiente ne’e, iis kotu iha tersa (21/09) kalan tuku 20.44.

“Familia kolabora ho ekipa saúde atu hala’o funeral tuir protokolu ne’ebé adota iha Timor-Leste,” dehan Rui.

Entretantu, husi horseik (21/09) mai ohin teste PCR ne’ebé Laboratoriu Nasional Saúde halo iha Dili hamutuk na’in 284 kompostu husi Vijilansia sentinela na’in 72, Contact tracing na’in 42, Random screening  na’in 41, Viajen sai husi serka sanitaria Dili na’in 90, Viajen internasional na’in 22 no Follow up iha kuarentena na’in 17.

Teste PCR ne’ebé halo iha Munisipiu sira seluk, RAEOA no HNGV hamutuk na’in 329. Ohin iha Izolamentu Vera Crus, Lahane, HNGV no fatin seluk iha teritoriu laran tomak halo tratamentu hospitalizadu ba kazu detetadu hamutuk na’in 54 kompostu husi kazu grave na’in 10, moderadu na’in 26 no kazu leve na’in 18.